Gyda’r Nadolig yn agosáu ni allaf feddwl am well ffordd o gofnodi amser hwn o’r flwyddyn na thrwy gynnwys delweddau Nadoligaidd o gasgliadau’r Llyfrgell ar y blog. Mae’r delweddau ‘dwi wedi eu dewis yn perthyn i gasgliad ffotograffig Geoff Charles- yr enwog ffoto newyddiadurwr a roddodd 50 mlynedd o’i oes i bortreadu Cymru trwy lens ei gamera.
Mae’r ffotograff cyntaf yn dangos Siôn Corn yn cyrraedd yr Amwythig yn Rhagfyr 1950 gan ddefnyddio ffordd anarferol iawn o deithio! Roedd cannoedd ar gannoedd o deuluoedd yn disgwyl amdano i’w groesawu i’r ardal.
Siôn Corn yn cyrraedd yr Amwythig (GCH01232)
Mae’r ail ffotograff yn dangos Mrs Mary Edwards o Fferm Y Ro-wen, Conwy, yn Rhagfyr 1963, fu’n fuddugol gyda’i rysáit cacen Nadolig.
Mrs Mary Edwards, Fferm Y Ro-wen, Conwy (GCH33787)
Dengys y ffotograff olaf griw o fechgyn ifanc, yn ystod Gaeaf 1954, yn adeiladu iglw yn yr eira.
Adeiladu iglw yn yr eira (GCH07497)
Gallwch weld rhagor o luniau Geoff Charles ar ein catalog ar-lein neu drwy edrych ar ein tudalen Flickr Commons.
Nadolig Llawen bawb!
Bethan Rees