Cadair Eisteddfod yr Urdd - o Aber i'r Bae

Gwe, 06 Maw 09 17:04:00

 

Llyfrgell Genedlaethol Cymru fydd yn cyflwyno cadair Eisteddfod Genedlaethol Urdd Gobaith Cymru, Bae Caerdydd eleni. Fe gaiff y gadair ei chyflwyno i’r bardd ifanc, buddugol ar lwyfan Canolfan Mileniwm Cymru fel rhan o seremoni y cadeirio yr Eisteddfod ym mis Mai. 

 

Arnold James, cyn athro Celf, Dylunio a Thechnoleg o Lanelli yw gwneuthurwr y gadair – y bedwaredd gadair Eisteddfodol iddo ei chreu – ac mae’r sialens o greu’r gadair eisoes ar waith.

 

“Rwy’n teimlo’n falch iawn for yr Urdd wedi gofyn i mi greu’r gadair hon eleni,” meddai Arnold James sy’n defnyddio garej ei dy yn Llanelli fel gweithdy. “Cadair Eisteddfod Powys yn yr wythdegau oedd y cyntaf i mi ei chreu, a hynny pan oeddwn i’n byw yn ardal. Ro’n i hefyd yn gyfrifol am gadair Eisteddfod yr Urdd, Wrecsam yn ’97 a chadair yr Eisteddfod Genedlaethol yn Llanelli yn 2000.

 

“Creu model fechan o’r gadair yw cam cyntaf y broeses greu bob tro,” medd Arnold James. “Wedi i’r Llyfrgell weld y cysyniad ac i ni ei drafod, byddaf yn mynd i’r afael â dewis coedyn addas ar gyfer y gwaith cyn cychwyn o ddifri ar y gadair ei hun.”

 

Fe gaiff y gadair ei chyflwyno i’r bardd buddugol am gerdd gaeth neu rydd heb fod dros 100 llinell ar y testun ‘Ymlaen’. Hywel Griffiths a Karen Owen sy’n beirniadau’r gystadleuaeth a’r dyddiad cau ar gyfer cystadleuwyr oedd 1 Mawrth 2009.

 

Meddai R Arwel Jones, Cyfarwyddwr Gwasanaethau Cyhoeddus Llyfrgell Genedlaethol Cymru, “Mae'r Llyfrgell yn frwd iawn dros y gwasanaeth a gynigir ganddi i blant a phobl ifanc Cymru trwy ei Gwasanaeth Addysg a'r trysorau sydd ar gael iddynt ar lein.

 

“Rydym yn falch iawn o gael cyflwyno’r gadair i enillydd Eisteddfod Genedlaethol yr Urdd, Bae Caerdydd ac o'r cyfle i gydweithio gydag Arnold James ar y cynllun."

 

Dywed Aled Siôn, Cyfarwyddwr Eisteddfod Genedlaethol Urdd Gobaith Cymru, “Rydym yn ddiolchgar iawn i’r Llyfrgell Genedlaethol am eu rhodd hael i Eisteddfod Bae Caerdydd. Mae seremoni y cadeirio yn wledd i’r llygaid bob tro ac edrychwn ymlaen at weld y gadair yn cael ei chyflwyno i’r bardd buddugol ar lwyfan Canolfan y Mileniwm ym mis Mai.”

 

Swyddfa'r Wasg

Medi Jones-Jackson

medi.jones-jackson@llgc.org.uk

01970 632 534