Enwebiad ar gyfer gwobr anrhydeddus i Archif Genedlaethol Sgrin a Sain Cymru

Iau, 30 Ebr 09 12:11:00

 

Mae Archif Genedlaethol Sgrin a Sain Cymru, wedi derbyn enwebiad ar gyfer Gwobrau Focal, a fydd yn cael eu cynnal yng ngwesty’r Royal Lancaster yn Llundain ar 5 Mai. Mae’r enwebiad am y gwaith adfer ar y ffilm Memoirs of a Pit Orchestra.

 

Gwnaed y ffilm yn 1981, ac mae wedi’i chyfarwyddo gan Richard Watkins. Ceir yma gyfres o ddeialogau a golygfeydd yn defnyddio barddoniaeth Idris Davies, Harri Webb, Alun Lewis, Leslie Norris, Dannie Abse a John Davies. Gyda deunydd archif o’r ddau ryfel byd, a band o gerddorion, mae’r cyfarwyddwr yn edrych ar ei ardal enedigol, sef y de diwydiannol, wedi’i ddylanwadu gan ffyniant ac anhawsterau cyfalafiaeth imperialaidd.

 

Dywedodd John Reed, Swyddog Cadwraeth Archif Genedlaethol Sgrin a Sain Cymru –

 

“Roedd y gwaith adfer yn cynnwys gwneud negatifs newydd 16mm o’r llun, traciau sain magnetig newydd, ail-olygu a chyfamseru’r llun a’r sain, ac yna creu trac sain magnetig newydd. Yna, crëwyd negatif llun a sain newydd a’i gyfateb â’r negatifs sain i greu print sain newydd yn addas i’w ddangos.”

 

Focal yw Ffederasiwn Archifau Clyweledol Masnachol, ac mae’n gorff sy’n cael ei gydnabod yn rhyngwladol.

 

Dywedodd Anwen Pari Jones, Swyddog Datblygu a Rheoli Mynediad Archif Genedlaethol Sgrin a Sain Cymru –

 

“Mae derbyn enwebiad am wobr Focal yn lwyddiant mawr ac yn anrhydedd i’r sawl oedd ynghlwm a’r gwaith adfer. Mae adfer ffilmiau fel yr un yma, yn rhoi cyfle i genedlaethau’r dyfodol fwynhau ffilmiau gwych a fyddai fel arall ar goll am byth.”

 

 

Swyddfa'r Wasg

Medi Jones-Jackson

01970 632 534

medi.jones-jackson@llgc.org.uk