Gwena! – Portreadau o’r Cymry

Gwe, 05 Chw 10 15:56:00

Cynhelir lansiad arddangosfa Gwena! – Portreadau o’r Cymry ar nos Wener 12 Chwefror 2010 yng nghwmni’r cyflwynydd, canwr a ffarmwr, Dai Jones, Llanilar. Yno hefyd fydd y cartwnydd o Gaerdydd, ‘Picasso’ Griffiths, i dynnu portreadau unrhyw un sy’n dymuno, yn y fan a’r lle. 

 

Cynhelir Gwena! rhwng 1 Chwefror a 19 Mehefin 2010 yn safle ysblennydd Oriel Gregynog yn y Llyfrgell Genedlaethol. Bydd yr arddangosfa'n llawn o bortreadau Cymry’r gorffennol a’r presennol. Bydd yn gyfle unigryw i weld rhai o wynebau eiconig a mwyaf enwog a diddorol Cymru sydd yng nghasgliad anferth y Llyfrgell Genedlaethol.

 

Casgliad portreadau’r Llyfrgell yw’r casgliad mwyaf o bortreadau Cymreig yn y byd ac mae'n cynnwys degau o filoedd o ddelweddau mewn ystod eang o gyfryngau, o ffotograffau i frasluniau, engrafiadau a gweithiau celf mewn ffrâm.

 

Mae’r arddangosfa’n llawn ‘beirdd a chantorion, enwogion o fri’. Yn eu mysg mae lluniau o bencampwyr megis y bocsiwr byd-enwog o Drecelyn yng Ngwent, Joe Calzaghe, chwaraewyr rygbi fel Barry John ac Ieuan Evans a’r athletwraig, Tanni Grey-Thompson.

 

Cawn weld casgliad o gartwnau cynnar o Vanity Fair; portread o Christmas Evans y gweinidog anghydffurfiol oedd ag ond un llygad; Griff Rhys Jones, yr actor adnabyddus a Mary Hopkin y gantores, ynghyd â rhai o wleidyddion enwog Cymru gan gynnwys David Lloyd George, Aneurin Bevan, Gwynfor Evans a Neil Kinnock .... ac wrth gwrs, Dai Jones.

 

Lansiad Arddangosfa Gwena! – Portreadau o’r Cymry

18:30 nos Wener

12 Chwefror 2010

 

Arddangosfa Gwena! – Portreadau o’r Cymry

1 Chwefror – 19 Mehefin 2010

Llyfrgell Genedlaethol Cymru

 

Gwybodaeth bellach

Siôn Jobbins, Swyddfa’r Wasg LlGC: 01970 632 902  post@llgc.org.uk

 

I fynychu’r lansiad rhowch wybod i Sian Henson ar:

sian.henson@llgc.org.uk  01970 632545