‘Boddhad Defnyddwyr yn Uchel’ yn LlGC

Iau, 19 Aws 10 14:33:00

Mae ymwelwyr a defnyddwyr Llyfrgell Genedlaethol Cymru yn Aberystwyth yn derbyn croeso cynnes a gwasanaeth rhagorol. Ac mae hynny’n swyddogol!

Daw’r asesiad yma mewn adroddiad gan yr East Midlands Quality Centre a gyflwynodd adroddiad safon Gwasanaeth Cwsmer Rhagorol i’r Llyfrgell yn ddiweddar.

 

Noda’r adroddiad;

 

‘Mae Llyfrgell Genedlaethol Cymru yn defnyddio egwyddorion Gwasanaeth Cwsmer Rhagorol ym mhob rhan o’r gwasanaethau mae’n cynnig. Mae gwrando ar ddefnyddwyr ac ymateb i’r hyn a ddywedant yn llunio’r gwasanaeth maent yn ei gynnig. Mae mynediad yn dda i ddefnyddwyr academaidd a bu’r croeso eang i’r penderfyniad diweddar i ailagor ar y Sadwrn. Mae adnoddau ar gyfer rhai ag anghenion arbennig yn dda, ac mae staff yn ymateb yn gyflym ac yn serchog i ymholiadau. Yn fwy na dim, cynigia’r Llyfrgell awyrgylch gyfeillgar a chroesawus ac mae’r staff, yng ngeiriau un defnyddiwr a holwyd yn barod i fynd ‘filltir ymhellach’.

 

Mae’r Llyfrgell Genedlaethol yn naturiol yn falch iawn i dderbyn adroddiad mor bositif. Aseswyd y Llyfrgell yn erbyn 57 criteria a chyrhaeddwyd cydymffurfiad llawn ymhob un, gyda rhai rhannau o wasanaeth cyhoeddus yn cyrraedd safon ‘cydymffurfiaeth uwch’.

 

‘Profa hyn fod y Llyfrgell yn anelu i drin pob ymwelydd a defnyddiwr gyda’r un faint o ofal a phroffesiynoldeb. Mae’r adroddiad hyn yn sicr yn help i roi’r Llyfrgell ymysg prif atyniadau twristiaeth ddiwylliannol y Llywodraeth ac yn rhoi Aberystwyth a Chymru ar y map,’ meddai Arwel Jones, Cyfarwyddwr Gwasanaethau Cyhoeddus, Llyfrgell Genedlaethol Cymru.

 

Gwybodaeth Bellach

Siôn Jobbins, Swyddfa’r Wasg LlGC: 01970 632 902  post@llgc.org.uk