Adolygiad o flwyddyn LlGC 2009-10

Dwy filiwn o bunnoedd i ddigido papurau newydd a chylchgronau Cymru G19; ailagor Ystafell Ddarllen y Gogledd ar ei newydd wedd; trefnu dau fis o ddigwyddiadau y tu allan i Aberystwyth - dyma ond rhai o’r uchafbwyntiau a amlinellir yn Adolygiad y Flwyddyn 2009-10, a gellir ei darllen arlein.

Roedd y flwyddyn yn sicr yn un bwysig yn ymdrechion parhaus y Llyfrgell Genedlaethol i wella ei gwasanaethau i ddarllenwyr ac ymwelwyr a’r modd y mae’n casglu, storio a rhannu ei thrysorau.

Roedd y grant o £2m gan Lywodraeth y Cynulliad i ddigido papurau newydd a chylchgronau Cymru yn un o’r prosiectau mwyaf cynhyrfus yn hanes diweddar y Llyfrgell ac yn un o’r cynlluniau digido mwyaf uchelgeisiol a welwyd erioed yng Nghymru. Dangosodd Ystafell Ddarllen y Gogledd a agorwyd ar ei newydd wedd gan y Gweinidog Treftadaeth, Alun Ffred Jones, ym mis Medi 2009, y ffordd newydd o feddwl a ddatblygwyd gan y Llyfrgell wrth ymateb i anghenion darllenwyr. Mae’r cynllun a’r adnoddau wedi eu dylunio fel bod gweithio yn y Llyfrgell yn bleserus a buddiol. Am y tro cyntaf erioed estynnodd y Llyfrgell ei ‘chyfarfod estyn’ blynyddol o ddeuddydd y ddau fis. Trefnwyd amrywiaeth eang o ddigwyddiadau llwyddiannus yng Nghwm Gwendraeth rhwng mis Medi a Thachwedd 2009. Roeddynt yn cynnwys; arddangosfa, prosiectau gydag ysgolion, creu ffilm, sgrinio ffilm, noson hel achau a chyfarfodydd gyda chlybiau a chymdeithasau lleol.

Ymysg y ffeithiau diddorol am y flwyddyn mae’r ffaith i’r Llyfrgell dderbyn bron i 8,000 o ymholiadau, 80,000 o ymwelwyr a darllenwyr, 397 ymweliad gan grŵp a dros filiwn o ddefnyddwyr rhwydwaith allanol.

Mae Llyfrgellydd y Llyfrgell Genedlaethol yn hynod o falch o allu’r Llyfrgell i addasu i natur cymdeithas sy’n newid y sydyn a’r ffyrdd mae pobl Cymru a’r byd am wneud defnydd o adnoddau a chasgliadau’r Llyfrgell.

‘Yn y cyfnod ansicr yr ydym yn byw ynddi mae’r Llyfrgell Genedlaethol yn parhau i fod yn rhan bwysig o fywyd Cymru. Hyderaf fod yr adolygiad yma o 2009-10 yn tanlinellu’r ffaith ein bod ni’n ceisio darganfod ffyrdd newydd o ddatblygu’n cennad oesol.’

‘Meddai’r Gweinidog Treftadaeth, Alun Ffred Jones;

‘Mae Llyfrgell Genedlaethol Cymru yn un o sefydliadau diwylliannol ac addysgiadol bwysicaf Cymru ac fe’i cydnabyddir hi fel canolfan ymchwil o bwysigrwydd rhyngwladol. Dangosa’ adroddiad yma eu bod yn parhau i ddatblygu a chanfod ffyrdd newydd i roi gwasanaeth i bobl ac mae’r niferoedd sy’n ymweld â’r llyfrgell yn gorfforol neu ar-lein yn galonogol.’

Am wybodaeth bellach a delweddau:
Siôn Jobbins, Swyddfa’r Wasg LlGC: 01970 632902  post@llgc.org.uk

Golud Chwiliadwy: Adolygiad o'r flwyddyn 2009-10