Awr Ddaear WWF

Iau, 17 Maw 11 14:06:00

Mae Llyfrgell Genedlaethol Cymru yn Aberystwyth wedi cofrestru i gefnogi Awr Ddaear WWF am yr ail flwyddyn yn olynol. Mae hyn wedi helpu Cymru i fod yn un o 130 o wledydd ar draws y byd ar amcangyfrif - nifer sy’n torri’r record - sydd wedi cofrestru ar gyfer y fenter fyd-eang i ddangos eu bod eisiau gweld gweithredu yn erbyn y newid yn yr hinsawdd.

Nos Sadwrn 26 Mawrth 2011 am 8.30pm bydd edrychiad Allt Penglais yn y dref yn newid wrth i’r Llyfrgell Genedlaethol ymuno â 30 o adeiladau a strwythurau ar draws Cymru a diffodd ei goleuadau i gefnogi Awr Ddaear WWF. Bydd rhain yn cynnwys Eglwys Gadeiriol Llandaf yng Nghaerdydd a bydd cefnogwyr hirsefydlog yr ymgyrch, CADW, yn diffodd y goleuadau ar bum heneb ar draws Cymru gan gynnwys Castell Caernarfon ac Abaty Tyndyrn yn sir Fynwy. Bydd awdurdod lleol Abertawe yn diffodd y goleuadau ar Ganolfan Ddinesig y ddinas a bydd adeilad y Senedd ym Mae Caerdydd yn tywyllu unwaith eto i gefnogi gweithredu cryf yn erbyn y newid yn yr hinsawdd. 

Gall siroedd fonitro eu cynnydd unigol ar fap rhyngweithiol newydd ar gyfer Awr Ddaear earthhourmap.wwf.org.uk
Wrth i fwy o bobl gofrestru i ddiffodd eu goleuadau, gallant weld sut mae eu hardal yn gwneud ac annog eu cyfeillion a’u teuluoedd i ymuno â nhw wrth helpu i sicrhau bod eu sir yn dod yn amlwg.

Gall ysgolion, cymunedau, sefydliadau ac unigolion gymryd rhan yn 2011 i ddangos eu bod yn cefnogi pobl a bywyd gwyllt y mae’r newid yn yr hinsawdd yn eu bygwth. 
Drwy gofrestru ar gyfer Awr y Ddaear mae pobl yn dangos i’r llywodraeth eu bod eisiau  gweld gweithredu i wneud cyflenwad ynni’r wlad yn lanach a lleihau’r effaith mae’n ei chael ar ein planed. 

Eisoes mae pobl o gwmpas y wlad yn trefnu digwyddiadau Awr y Ddaear, o bartïon cinio yng ngolau canhwyllau a diwrnodau ‘gwisgo lliwiau’ yn y gwaith i fflachdorfeydd yn dawnsio a gweithdai gwneud llusernau – nid yw’n fater o eistedd yn y tywyllwch am awr, ond o gael hwyl a gwneud 26 Mawrth yn noson i’w chofio! 

'Mae Awr Ddaear WWF yn gyfle sy’n ysbrydoli pobl i wneud rhywbeth cadarnhaol i helpu i fynd i’r afael â’r newid yn yr hinsawdd,' 
meddai Anne Meikle, Pennaeth WWF Cymru. 

'Rydym wrth ein bodd fod adeilad mor amlwg â Llyfrgell Genedlaethol Cymru yn Aberystwyth wedi cytuno unwaith eto i ymuno ag Awr Ddaear WWF. Mae hyn yn dangos ei hymrwymiad i roi arweiniad ar y newid yn yr hinsawdd yn y gymuned a thrwy hyn annog eraill i fod yn rhan o ymgyrch ryngwladol i ddangos i arweinwyr yng Nghymru a’r byd fod pobl eisiau iddyn nhw fynd i’r afael â’r newid yn yr hinsawdd.'

'Hoffwn annog pobl Aberystwyth ac mewn cymunedau ledled Cymru i ymuno trwy gofrestru eu cefnogaeth i’r ymgyrch ar lein ar www.wwf.org.uk/earthhourwales2011'

Meddai Andrew Green, Llyfrgellydd y Llyfrgell Genedlaethol:

'Mae cynaladwyedd amgylcheddol yn un o brif elfennau polisi’r Llyfrgell. Felly' mae’n fraint i Lyfrgell Genedlaethol Cymru gymryd rhan yn y digwyddiad arwyddocaol hwn, ac yn fwy nag addas y bydd un o adeiladau enwocaf ac amlycaf Cymru’n cael sylw mawr'

Sut bynnag y dewiswch gefnogi Awr Ddaear WWF mae’n hollbwysig i chi wneud i’ch cefnogaeth gyfrif, felly gwnewch yn siŵr y cofrestrwch ar wwf.org.uk/earthhourwales 

Nodiadau i olygyddion
WWF Cymru yw cangen Cymru o’r WWF Network, sefydliad amgylcheddol mwyaf blaenllaw’r byd a sefydlwyd yn 1961 ac sydd bellach yn weithredol mewn mwy na 100 o wledydd. 

Gwybodaeth bellach:
Kim Richards, WWF Cymru, ffôn: 029 2045 4972, symudol: 07920 211534, 
e-bost: krichards@wwf.org.uk

neu cysylltwch â Elin Hâf, Swyddfa’r Wasg, Llyfrgell Genedlaethol Cymru 01970 632534 neu post@llgc.org.uk