The National Library of Wales
Cefnogwch Ni
Cefnogwch ni i ddatblygu ein casgliadau a'n gwasanaethau ar gyfer cenedlaethau'r dyfodol.
Kyffin Williams: Y Wladfa
Mer, 02 Chw 11 15:01:00
O 5 Chwefror 2011 hyd at 4 Medi 2011 bydd arddangosfa o waith Syr Kyffin Williams ar y Wladfa i’w weld yn Oriel Môn. Caiff yr arddangosfa ei hagor yn swyddogol ar nos Wener, Chwefror 4, 2011 gan frodor o Batagonia, Elvey MacDonald.
Mae’r arddangosfa hon yn rhoi cipolwg ar dirlun a phobl y Wladfa gan Kyffin yn ystod ei ymweliad â Phatagonia ym 1968-1969 pan enillodd Gymrodoriaeth Winston Churchill i gofnodi disgynyddion y gwladychwyr Cymreig.Daw gweithiau’r arddangosfa o gasgliad yr Oriel, casgliadau preifat a chenedlaethol yn cynnwys canran fawr gan Llyfrgell Genedlaethol Cymru.Ceir casgliad o weithiau pensil, inc, dyfrlliw ac olew yn amrywio o baentiadau a gweithiau mawr ar bapur i sgetys bach.
Mae yma hefyd gyfle prin i weld rhai o’r ffotograffau a dynnwyd gan Kyffin ar ei gamera personol o gymeriadau’r Wladfa. Bydd yr arddangosfa hefyd yn cynnwys rhai o eitemau personol Kyffin o’i ymweliad fel, teithlyfr, cerdyn glanio, a dau o docynnau cwmni hedfan ‘Aeroineas Argentinas’ ymysg pethau eraill.
Meddai Deilydd Portffolio Datblygu Economaidd, Twristiaeth a Hamdden, Cyngor Sir Ynys Môn, y Cyng Bob Parry OBE:
'Rydym yn hynod ddiolchgar i bawb, ac yn arbennig i Lyfrgell Genedlaethol Cymru, sydd wedi ein cynorthwyo i greu arddangosfa sy’n cofnodi yr amser a ddyweddod Kyffin oedd y mwyaf cyffous a chofiadwy o’i fywyd.’
Pan fu farw ym Medi 2006, gadawodd yr arlunydd Cymreig byd enwog, Syr Kyffin Williams, ran helaeth o’i ystâd i Lyfrgell Genedlaethol Cymru. Mae’r gymynrodd yn cwmpasu’r gweithiau a grewyd gan yr artist, ac yn eiddo iddo, ei gasgliad eang o gelf gan eraill, ei brintiau, ei archifau, medalau, ynghyd â chasgliad bach o adar ac anifeiliaid mewn efydd.
Yng Ngwanwyn 2008 sefydlwyd Prosiect Cymynrodd Kyffin Williams gan Llyfrgell Genedlaethol Cymru. Dechreuwyd ar y gwaith o gatalogio’r gweithiau celf a’r archifau yn ystod Haf 2008 a cychwynwyd ar raglen ddigido ddechrau Haf 2009.
Un elfen amlwg o Brosiect Cymynrodd Kyffin yw Blog Kyffin. Bwriad y blog hwn yw darparu'r wybodaeth ddiweddaraf ynglŷn â'r catalogio ac agweddau eraill o'r prosiect, yn ogystal â chyfeirio at ambell eitem ddiddorol a ddaw i'r golwg wrth gatalogio.
Meddai Andrew Green, Llyfrgellydd Llyfrgell Genedlaethol Cymru
'Mae’n fraint gan y Llyfrgell Genedlaethol i gydweithio ag Oriel Ynys Môn ar yr arddangosfa arbennig hon o waith Syr Kyffin Williams, ac edrychwn ymlaen at gael cydweithio ar brosiectau cyffelyb yn y dyfodol agos.’
I gydfynd â’r arddangosfa cynhelir amryw o ddigwyddiadau yn Oriel Ynys Môn, ac ar 1 Gorffennaf 2011 bydd William Troughton, Llyfrgellydd Delweddau Gweledol Llyfgrell Genedlaethol Cymru yn trafod ‘Kyffin – the Photographer’
Ymysg y digwyddiadau eraill:
Chwefror 18, 2011 am 7.00 yh
‘Patagonia: Kyffin’s Great Adventure’ – sgwrs gan David Meredith - awdur ‘Kyffin in Venice’ a ‘Kyffin Williams, Bro a Bywyd’.
Mawrth 25, 2011 am 7.00 yh
‘A Place of Meadows and Tall Trees’ – sgwrs gan yr awdures Clare Dudman am ei gwaith ymchwil i’w nofel sy’n olrhain hanes blynyddoedd cynnar y Cymry’n sefydlu ym Mhatagonia.
Prosiect Cymynrodd Kyffin Williams
Manylion Pellach
Elin Hâf, Swyddfa’r Wasg LlGC 01970 632534 neu post@llgc.org.uk
