The National Library of Wales
Penodiad newydd
Fri, 12 Sep 08 13:21:00
Mae'n bleser gan Lyfrgell Genedlaethol Cymru gyhoeddi fod Arwel "Rocet" Jones wedi’i benodi yn Gyfarwyddwr Adran Gwasanaethau Cyhoeddus y Llyfrgell.
Mae Arwel, yn enedigol o Rhos-y-bol, Ynys Môn, yn wyneb cyfarwydd i nifer ar draws Cymru ac yn lais cyfarwydd ar Radio Cymru ac ar S4C. Yn awdur ac yn fardd, fe addysgwyd Arwel yn Ysgol Uwchradd Amlwch a Phrifysgol Cymru Aberystwyth.
Ymunodd Arwel â staff Llyfrgell Genedlaethol Cymru ym 1991 pan y penodwyd ef yn Gynorthwy-ydd Ymchwil ar y Mynegai i Farddoniaeth Gymraeg y Llawysgrifau. Yn 2006 penodwyd Arwel yn Bennaeth Datblygiadau Digidol gyda chyfrifoldeb dros lywio a chydlynu strategaeth ddigido’r Llyfrgell. Yn ystod ei gyfnod yn y swydd enillodd y Llyfrgell gefnogaeth ariannol gan JISC (Joint Information Systems Committee) a Llywodraeth Cynulliad Cymru i ymgymryd â phrosiect blaengar i sganio a mynegeio 50 o gyfnodolion Cymreig a gyhoeddwyd ar ôl 1900.
Yn ei rôl newydd mi fydd Arwel yn gyfrifol am weithredu polisïau a strategaethau’r Llyfrgell o fewn yr Adran Gyhoeddus, cynyddu niferoedd ymwelwyr ac ehangu darparieth y Llyfrgell. Ef hefyd fydd yn gyfrifol am lywio a goruchwilio gwaith hyrwyddo, arddangosfeydd, Archif Sgrin a Sain a gwasanaethau darllenwyr y Llyfrgell.
Yn ôl Arwel, "Rwyf yn edrych ymlaen at ymgymryd â’r swydd newydd. Mae Llyfrgell Genedlaethol Cymru yn un o lyfrgelloedd mawr y byd ac yn sefydliad pwysig yn niwylliant a hanes Cymru. Edrychaf ymlaen at fod â rhan yn y gwaith o rannu’r trysorau hyn â phobl Cymru a’r byd."
Yn ôl Andrew Green, y Llyfrgellydd Cenedlaethol, "Rwyf wrth fy modd i groesawu Arwel Jones fel Cyfarwyddwr newydd Gwasanaethau Cyhoeddus y Llyfrgell. Bydd yn siwr o wneud cyfraniad sylweddol yn siapio dyfodol y Llyfrgell wrth i ni wynebu’r sialens o weithredu mewn oes ddigidol ac ymgymryd â newidiadau yn y byd gwybodaeth."
Am wybodaeth bellach
Medi Jones-Jackson
Swyddfa’r Wasg
Llyfrgell Genedlaethol Cymru
Aberystwyth
SY23 3BU
01970 632 534
