Darllenathon - 12 Awr o Ddarllen Di-Dor!

Fel rhan o ddathliadau Diwrnod y Llyfr, bydd staff Llyfrgell Genedlaethol Cymru (a rhai o'i darllenwyr mwyaf selog) yn cynnal Darllenathon ar ddydd Llun 26 Chwefror.

Gan ddechrau am 8.00 y bore a gorffen am 8.00 y nos bydd y sesiwn 12 awr ddi-dor yn cynnwys darlleniadau o'r drysorfa o lyfrau a deunydd print sydd yn y Llyfrgell Genedlaethol. Yn ogystal â darlleniadau yn y Gymraeg a'r Saesneg, ceir y cyfle i wrando ar ddarlleniadau yn rhai o'r ieithoedd eraill a siaredir gan staff y Llyfrgell, gan gynnwys Ffrangeg, Almaeneg, Africaans, Tsieinëeg a Gwyddeleg.

Cynhelir y Darllen Di-dor yn awditoriwm y Drwm a bydd croeso i aelodau'r cyhoedd daro i mewn i fwynhau'r darlleniadau. Yn ogystal â chodi ymwybyddiaeth o gasgliadau'r Llyfrgell bydd y Darllen Di-dor yn casglu arian a llyfrau ar gyfer elusen Book Aid International.

Trefnir y digwyddiad gan Gymdeithas Staff y Llyfrgell ac mae'n rhan o ddathliadau canmlwyddiant y Llyfrgell - sefydlwyd y Llyfrgell ar 19 Mawrth 1907.

'Mae'r Llyfrgell yn cynnwys bron i 5 miliwn o lyfrau - mae pob diwrnod yn Ddiwrnod y Llyfr i ni mewn gwirionedd felly. Ond penderfynwyd eleni am y tro cyntaf i gynnal Darllenathon. Edrychwn ymlaen at groesawu aelodau o'r cyhoedd i'r digwyddiad - bydd hi'n ddiwrnod arbennig i bawb sy'n hoff o lyfrau o bob math!' esboniodd Ceri Skinner, Ysgrifennydd y Gymdeithas Staff.

Gwybodaeth Bellach: Siôn Jobbins, Swyddfa'r Wasg LlGC: 01970 632902 sij@llgc.org.uk

AMSERLEN Y DARLLEN DI-DOR