Diwrnod Agored Llyfrgell Genedlaethol Cymru 2009

Mon, 12 Jan 09 14:05:00

 

Eleni eto fe fydd y Llyfrgell Genedlaethol yn agor ei drysau led y pen i wahodd pawb i ymuno yn ein Diwrnod Agored blynyddol ar ddydd Sadwrn 24 Ionawr. Mae’r diwrnod, sydd yn cynnwys darlithoedd, cyflwyniadau, teithiau tywys a sgyrsiau oriel, wedi profi’n hynod o lwyddiannus yn y gorffennol - ac ni fydd eleni’n eithriad.

 

Cynhelir nifer o weithgareddau trwy gydol y diwrnod a fydd yn sicr yn apelio at oedolion ac ymwelwyr ifanc. Ymysg y digwyddiadau ceir nifer o deithiau tywys o adrannau’r Llyfrgell. Bydd y teithiau tywys yn ymweld ag Uned Gadwriaethol Ataliol, sydd yn sicrhau fod casgliadau’r Llyfrgell yn cael eu diogelu i safonau uchel ac Archif Genedlaethol Sgrin a Sain Cymru, sydd yn gartref i dros 9 miliwn troedfedd o ffilm.

 

Bydd hefyd nifer o ddarlithoedd a chyflwyniadau gan gynnwys:

 

• Adnoddau Hanes Teulu yn y Llyfrgell Genedlaethol dan ofal Beryl Evans;

• Motions of the Mind: Leonardo’s drawings for the Last Supper; darlith gan Simon Pierse

• Holy Wells of Wales - A Photographic Journey sgwrs am y llyfr gan yr awdur Phil Cope

• Mapio’r Grŵp Cymreig yn 60 gan guradur yr arddangosfa Dr Ceri Thomas

• Gweithdy Gelf i blant dan ofal yr artist Blue MacAskill. Mae’r gweithdy yn rhedeg drwy’r dydd, felly gallwch adael eich plant mewn dwylo diogel a chreadigol, wrth ichi fwynhau digwyddiadau eraill y diwrnod

 

Ceir nifer o ddigwyddiadau pellach yn ystod y diwrnod gan gynnwys Gweithdy Cadwraeth - cyfle i weld a sgwrsio gydag aelod o staff Uned Gadwraeth y Llyfrgell. Ceir hefyd ddangosiadau yn Siop y Llyfrgell o waith Strata Stained Glass Studio - arbennigwyr mewn gwydr lliw a Gwynedd Confectioners - i bawb sydd â dant melys.

 

Mae pob un o’r digwyddiadau’n rhad ac am ddim. Mae llefydd yn gyfyng, felly mae’n angenrheidiol eich bod yn archebu tocynnau: www.llgc.org.uk/drwm  01970 632 548

 

Edrychwn ymlaen at eich croesawu!

 

Manylion pellach

Cyril Evans

cyril.evans@llgc.org.uk

01970 632 565

 

Swyddfa'r Wasg

Medi Jones-Jackson

medi.jones-jackson@llgc.org.uk

01970 632 534