'The Life Story of David Lloyd George' nawr ar DVD

Fri, 06 Mar 09 11:44:00

 

Mae ffilm fud nodedig am David Lloyd George a fu ar goll am ddegawdau bellach ar gael ar DVD. 

 

Mae hanes y ffilm yn un rhyfeddol a llawn dirgelwch. Wedi iddi gael ei hatal yn anesboniadwy yn 1918, fe ddiflannodd am 76 mlynedd cyn cael ei hailddarganfod gan Archif Ffilm a Theledu Cymru bellach Archif Genedlaethol Sgrin a Sain y Llyfrgell Genedlaethol. Yn dilyn gwaith adfer dyfal, dangoswyd y ffilm am y tro cyntaf yng Nghaerdydd yn 1996 ac yna mewn rhannau eraill o Brydain a ledled y byd. 

 

Mae’r ffilm a wnaed gan y cyfarwyddwr cynhyrchiol Maurice Elvey, yn dilyn bywyd Lloyd George o’i blentyndod hyd ddiwedd y Rhyfel Mawr, gan ddefnyddio actorion a channoedd o ecstras mewn golygfeydd yn y stiwdio ac mewn lleoliadau hanesyddol. Mae Norman Page yn rhoi perfformiad meistrolgar fel Lloyd George wrth iddo symud o leoliadau yn y cartref, yr ysgol a’i waith tuag at uchafbwynt ei yrfa wleidyddol. Ar ei daith o fod yn ddeddfwr cymdeithasol i fod yn arweinydd rhyfel mae’n wynebu byd o derfysgoedd, diwygiadau cymdeithasol a recriwtio. Defnyddir golygfeydd syfrdanol o dyrfaoedd a dyfeisiadau hyderus megis ôl-fflachiau lliw a gweledigaethau proffwydol.

 

Cyfansoddwyd y gerddoriaeth yn arbennig ar gyfer y DVD gan y pianydd enwog, Neil Brand. Mae’r DVD hefyd yn cynnwys cyflwyniad gan yr actor Philip Madoc a chyfweliadau gyda’r hanesydd ffilm Kevin Brownlow, ynghyd â llyfryn 16 tudalen.

 

The Life Story of David Lloyd George, 152’ (gydag ychwanegiadau 47’), ar gael o siop y Llyfrgell, pris  £18.99.

Ffôn: 01970 632 548

 

Swyddfa'r Wasg

Medi Jones-Jackson

medi.jones-jackson@llgc.org.uk

01970 632 534