Arbenigwr blaenllaw ar Almaen y Natsïaid i siarad yn Aberystwyth

Mon, 18 May 09 15:26:00

  

Fe fydd yr Athro Richard J Evans, hanesydd amlwg ac arbenigwr blaenllaw ar y cyfnod Natsïaidd yn dychwelyd i’w wreiddiau fel y siaradwr gwadd mewn darlith arbennig wedi ei threfnu gan gynllun noddwyr Llyfrgell Genedlaethol Cymru, Penodau.

 

Bydd yr Athro, a benodwyd yn ddiweddar yn Athro Regius mewn Hanes Modern ym Mhrifysgol Caergrawnt, yn traddodi darlith ar ‘Looted Art in Europe 1938-45 and its restitution since the Second World War’. Cynhelir y ddarlith yn y Drwm, Llyfrgell Genedlaethol Cymru ar nos Fercher, 27 Mai am 19.30 pm.

 

Wedi ei eni yn Llundain i rieni o Gymru mae ganddo gysylltiadau teuluol cryf gydag ardal Machynlleth. Roedd teulu ei dad yn hanu o fferm fynydd ger Pantperthog, a bu ei ewythr yn rhedeg yr H J Evans Drug Store yn 25 Stryd Maengwyn, Machynlleth, am yn tynnu at 20 mlynedd ar ôl yr Ail Ryfel Byd.
 
Ers gweithredu fel y prif dyst arbenigol yn achos enllib David Irving yn yr Uchel Lys yn Llundain yn 2000, mae gwaith yr Athro Richard J Evans wedi ymwneud yn bennaf â’r Holocost. Cyhoeddodd yn ddiweddar The Third Reich at War, 1939-1945, y drydedd gyfrol, a’r olaf mewn cyfres ar hanes yr Almaen dan y Natsïaid.

Nododd Andrew Green, y Llyfrgellydd, ’Gyda bron i 70 mlynedd ers dechrau’r Ail Ryfel Byd mae’r pwnc am ysbeilio celf yn hynod amserol. Mae talaith Califfornia yn yr Unol Daleithiau newydd ddychwelyd tri  darlun o gyfnod y Dadeni a gymrwyd oddi ar ddelwyr celf Iddewig yn yr Almaen yn 1930au, i ddisgynyddion ei cyn berchnogion. Roedd y darluniau wedi eu harddangos mewn amgueddfa yng Nghaliffornia ers dros ddeg mlynedd ar hugain.

 

Ein nod yw sicrhau fod aelodau Penodau’n cael profiadau arbennig ac yn hynny o beth rydym yn hynod falch o gefnogaeth bobl amlwg fel yr Athro Richard J
Evans. Pleser arbennig fydd ei groesawi yma i’r Llyfrgell i annerch. Mae’n argoeli i fod yn noson gofiadwy.’

 

Darlith yr Athro Richard J Evans

Mercher, 27 Mai 2009

'Looted Art in Europe 1938-45 and its restitution since the Second World War’.

19.30 Derbyniad Gwin
19.45 Darlith
 
Y Drwm, Llyfrgell Genedlaethol Cymru
Mynediad trwy docyn £5.00 - am ddim i aelodau Penodau

I archebu tocyn cysylltwch â Siop y Llyfrgell  (01970) 632 548 neu arlein www.llgc.org.uk/drwm

 

Dolenni

Gwefan Yr Athro Richard J Evans

 

Am fwy o wybodaeth

Rhian Haf Evans
Swyddog Codi Arian LlGC: Digwyddiadau a chyfranwyr

01970 632 938

rhian.evans@llgc.org.uk