Gŵyl y Gelli – Y Llyfrgell Yno!

Fri, 28 May 10 16:27:00

Bwriwch draw i ŵyl lyfrau y Guardian yn y Gelli Gandryll am flas o waith a chasgliadau’r Llyfrgell. Cewch glywed darlith ar ffotograffau hynod Hunter S Curtis o’r Indiaid Cochion, cyflwyniad i Lyfr Gwyn Rhydderch a’r Mabinogi, a sgwrs arbennig i awduron ar sut mae cadw eu gwaith rhag mynd yn ddifancoll ‘i’r oesoedd a ddel’.

 

Lyn Lewis Dafis, Pennaeth Uned Digido a Metadata'r Llyfrgell, sy’n traddodi darlith ar ffotograffau du a gwyn hynod Hunter S Curtis o’r Americaniaid Brodorol. Tynnwyd y ffotograffau hyn ar droad yr 20fed ganrif ac maent ymysg y ffotograffau mwyaf hynod yng nghasgliad y Llyfrgell. Bydd darlith Lyn am 18:45 nos Fawrth 1 Mehefin 2010.

 

Bydd Yr Athro Sioned Davies o Brifysgol Caerdydd, un o’r arbenigwyr pennaf ar y Mabinogi, yn rhoi darlith ar Lyfr Gwyn Rhydderch a’i gynnwys. Mae’r Llyfr Gwyn yn un o brif gasgliadau’r Llyfrgell Genedlaethol ac ynddo ceir y Mabinogi yn ei ffurf gynharaf a mwyaf cynhwysfawr. Bydd darlith Sioned am 09:00 fore Sul 6 Mehefin.

 

Mae’r Llyfrgell yn rhannu safle yn y Gelli eleni gyda nifer o gyrff llenyddol eraill Cymru - Cyngor Llyfrau Cymru, Yr Academi, Cyngor y Celfyddydau ac Adran Diwylliant y Llywodraeth. Gelwir y safle yn Culture Cymru ac ynddi ceir toreth o sgyrsiau a digwyddiadau am ddim trwy gydol yr wythnos.

 

Dewch draw i Culture Cymru am baned ac i wrando ar Ifor ap Dafydd o brosiect Archif Llenyddiaeth Cymru yn siarad yn Saesneg am ‘archifau digidol yn yr oes ddigidol’. Bydd yn siarad ddwywaith; am 16:00 ddydd Llun 31 Mehefin a 11:00 dydd Gwener 4 Mehefin 2010.

 

Dolenni

• Darlith ar Ffotograffau Hunter S Curtis
• Tudalen ar Hunter S Curtis (Wikipedia)
• Darlith ar Lyfr Gwyn Rhydderch a’r Mabinogi
• Tudalen LlGC ar Lyfr Gwyn Rhydderch
• Culture Cymru

Gwybodaeth Bellach

Siôn Jobbins, Swyddfa’r Wasg LlGC: 01970 632 902  post@llgc.org.uk