Celfi Cymru 1250 – 1950

Wed, 27 Jun 07 12:09:00

Mae Cymru’n fyd-enwog am ei Dresel Cymreig, ond ai dyna’r unig gyfraniad gan Gymru i fyd celfi a chrefft? A fedrwn ni son am y fath beth ag ‘arddull Gymreig’ a beth am y gwahanol arddulliau rhanbarthol o fewn Cymru?

Dyma rai o’r cwestiynau caiff eu hateb yn llyfr hir-ddisgwyliedig, urddasol, 2 gyfrol Richard Bebb, 'Welsh Furniture 1250 - 1950 - A Cultural History of Craftsmanship and Design'. Cyhoeddir y llyfr gan Saer Books gyda chefnogaeth gan Llyfrgell Genedlaethol Cymru ac Amgueddfa Cymru.
v

Ysgrifennwyd y llyfr dros gyfnod o 16 mlynedd. Cynhwysa rhyw 1,500 darlun, y mwyafrif helaeth ohonynt mewn lliw a’r mwyafrif o’r rheini erioed wedi eu cyhoeddi o’r blaen. Cynhwysa rychwant eang o hanes Cymru o Oes y Tywysogion yn 1250 i’r cyfnod cyfoes yn 1950. Mae’r llyfr yn dilyn trywydd nifer o lyfrau pwysig eraill sydd wedi herio ein dealltwriaeth o gelf Gymreig.

Yn frodor o Gwm Rhondda, graddiodd Richard Bebb mewn Anthropoleg Cymdeithasol o’r London School of Economics. Yn 1970 ymsefydlodd yng Nghydwely gan ddechrau ei yrfa fel gwerthwr hynafolion yn arbenigo mewn celfi o Gymru.

‘Rwy wastad wedi fy hudo gan gyd-destun cymdeithasol a chartref celfi a dechreuais astudio'r arteffactau hynod yma tua 1990. Teithiais yn faith o amgylch Cymru, Lloegr a’r Unol Daleithiau i astudio’r celfi a’r deunydd archifol mewn tai preifat a sefydliadau cyhoeddus,’ esboniodd Richard Bebb.

‘Mae gwaith Richard Bebb yn gampwaith o ddyfnder a manylder anhygoel. Dyma yw’r llyfr diffiniol a’r canllaw hanfodol i bawb sydd â diddordeb yn y pwnc ac yn hanes cymdeithasol Cymru. Rwy’n hynod o falch fod Llyfrgell Genedlaethol Cymru wedi cefnogi’r fenter hon a bod ein casgliad o luniau, arteffactau, archifau a chyhoeddiadau wedi chwarae rhan bwysig wrth ysgrifennu a chyhoeddi’r llyfr hwn,’ meddai Andrew Green, Llyfrgellydd y Llyfrgell Genedlaethol.

Manylion:

Welsh Furniture 1250 – 1950 – A Cultural History of Craftsmanship and Design. (Saer Books, ISBN 978-0-9553773-1-0)

Dwy gyfrol tua 380 tudalen 11.5 mod (290 mm) gan 9.5 mod (240 mm) yr un.

Price:£150

Mae copiau ar werth yn siop y Llyfrgell neu arlein: siop.llgc.org.uk

Gwybodaeth Bellach: 

Siôn Jobbins, Swyddfa’r Wasg LlGC: 01970 632 902  sij@llgc.org.uk

Gwefan Welsh Furniture: www.welshfurniture.com