Cadair Casgliadau Digidol – swydd newydd yn torri tir newydd

Mae’r Llyfrgell Genedlaethol yn chwilio am unigolyn eithriadol i lenwi swydd newydd ac unigryw sy’n cael ei hariannu gan Brifysgol Cymru a’i lleoli yn y Llyfrgell. Mae’n darparu cyfle i wneud cyfraniad arloesol ym maes casgliadau digidol.

Bydd disgwyl i ddeilydd y swydd arwain ac ymgymryd ag ymchwil yn seiliedig ar y datblygiadau diweddaraf yn ei dd/dewis faes o arbenigedd, tra’n cymhwyso canfyddiadau at y casgliadau digidol helaeth a gedwir yn Llyfrgell Genedlaethol Cymru. Bydd yn meddu ar broffil ymchwil diguro mewn agwedd arbennig o guraduriaeth ddigidol: creu, darparu, astudio, dehongli a gwarchod casgliadau digidol – yn cwmpasu materion cyfreithiol, rheoli data, dulliau ymchwil arloesol, a datblygiadau technolegol i gyrchu, chwilio a defnyddio.

Bydd yn meddu ar hanes rhagorol o gyhoeddi ac o ymwneud â’r cyhoedd, yn ogystal â phrofiad o ymchwil gydweithredol, gweithio mewn partneriaeth a chodi arian.

Mae hwn yn gyfle ardderchog i berson ymroddedig wneud cyfraniad nodedig i faes cynyddol bwysig.

Mae’r swydd yn cael ei chynnig am gyfnod o hyd at bum mlynedd.


Gwybodaeth bellach:
Disgrifiad swydd lawn

Cyswllt y wasg:
Elin-Hâf Williams, Swyddfa’r Wasg LlGC: 01970 632 534 post@llgc.org.uk