Llyfrgell Genedlaethol yn Mynd i Wrecsam

Wed, 22 Sep 10 16:58:00

Bydd Llyfrgell Genedlaethol Cymru yn symud i Wrecsam yr hydref hwn! Bydd cyfle gan drigolion y dre i fwynhau: diwrnod agored hanes teulu; sgrinio ffilm enwog Paul Robeson, 'Proud Valley'; cyfle i ddod a'u casgliadau eu hunain i'w digido a'u gosod arlein ar y wefan newydd www.casgliadywerincymru.co.uk; gweithdai i blant ac arddangosfa o hen ffotograffau o Wrecsam.

 

Er bod y Llyfrgell wedi cynnal digwyddiadau undydd blynyddol y tu allan i Aberystwyth yn y gorffennol, eleni bydd yn adeiladu ar ei strategaeth newydd o drefnu cyfres o ddigwyddiadau dros 2 fis. Y llynedd yr hen gwm glofaol, Cwm Gwendraeth ger Llanelli, a ddaeth yn ‘gartref oddi cartref’ i’r Llyfrgell; eleni Wrecsam fydd yn estyn croeso i’r Llyfrgell Genedlaethol i gynnal ei 2 fis o ddigwyddiadau yn yr Hydref.

 

Fel rhan o'i gwaith i godi ymwybyddiaeth ymysg pobl o bob cefndir o gasgliadau'r Llyfrgell, bu’r sefydliad yn cydweithio ag awdurdodau lleol yn y dref. Mae'r Llyfrgell yn ddiolchgar am gydweithrediad parod Cyngor Bwrdeistref Sirol Wrecsam ar y gyfres hon o ddigwyddiadau diddorol.

Mae’r Llyfrgellydd, Andrew Green, pennaeth y Llyfrgell Genedlaethol, yn edrych ymlaen at yr arlwy o ddigwyddiadau yn Wrecsam.

 

‘Mae Llyfrgell Genedlaethol Cymru yn eiddo i bobl Cymru oll ac mae’n hynod bwysig, a chyffrous i ni, deithio allan o Aberystwyth ac ymweld â phob cwr o Gymru. Eleni Wrecsam, tref sydd ag iddi ran bwysig yn hanes Cymru fydd ein cartref ni am dros ddau fis - rydym yn edrych ymlaen!’

 

Amserlen

7 Hydref - Ffilm: Proud Valley yn Sinema’r Odeon, 19:30

 

12 Hydref – Beth yw Llyfrgell Genedlaethol Cymru?, Ysgol Morgan Llwyd, 19:00

 

2 Tachwedd - Beth sy’n yr Atig? Dewch i weld gwefan newydd a dwedwch eich stori chi, www.casgliadywerincymru.co.uk, Llai, 10:00 - 16:00

 

11 Tachwedd – Noson Agored: Llywydd LlGC, Dafydd Wigley, yn arwain noson o sgyrsiau a chyflwyniadau, Guildhall Wrecsam, 18:30

 

11 Tachwedd – Yn dilyn y Noson Agored, Lansiad Arddangosfa ‘Hen Luniau o Wrecsam’ yn Llyfrgell Wrecsam 20:00

 

13 Tachwedd – Diwrnod Agored Hanes Teulu a Hanes Lleol, Coleg Iâl 10:00 – 15:00

 

 

Gwybodaeth Bellach

Am ragor o wybodaeth ewch i’r wefan: www.llgc.org.uk/wrecsam10 neu cysylltwch â Siôn Jobbins, Swyddfa’r Wasg LlGC 01970 632 902  post@llgc.org.uk

 

 

Nodiadau i’r Golygydd

Dathlodd Llyfrgell Genedlaethol Cymru ei chanmlwyddiant yn 2007. Mae ei chasgliadau yn cynnwys:

 

• 5,000,000 o lyfrau a deunydd printiedig
• 1,500,000 map
• 800,000 ffotograff
• 150,000 awr o recordiadau sain  
• 250,000 awr o ddelweddau symudol
• 25,000 llawysgrif prin
• 50,000 trysorau celf