Ffilmiau Archif ar Sgrîn Fawr Caerdydd

Fri, 29 Oct 10 12:28:00

Bydd siopwyr a cherddwyr yng nghanol y brifddinas yn gallu mwynhau cip olwg ar yr hen Gaerdydd. Gan ddechrau'r wythnos hon dangosir ffilmiau archif o gasgliad Archif Genedlaethol Sgrin a Sain Cymru ar sgrin fawr y BBC a leolir y tu allan i Neuadd Dewi Sant.

 

Dangosir chwe ffilm archif o’r casgliad a byddant yn cynnwys delweddau o bwll nofio’r Empire Pool yn 1968, a adeiladwyd ar gyfer Gemau’r Ymerodraeth yn 1958, a ffilm o ardal y dociau yn yr 1940au. Y clipiau ffilm eraill bydd canol Caerdydd yn yr 1930au sy’n cynnwys siopau Heol y Frenhines, yr Amgueddfa Genedlaethol a ffilm o’r bysiau, tramiau a threnau oedd yn gweithio’r cyfnod hynny.

 

Lleolir yr Archif Sgrin a Sain o fewn Llyfrgell Genedlaethol Cymru yn Aberystwyth. Mae’n gartref i gasgliad cynhwysfawr a digymar o ffilmiau, rhaglenni teledu, fideos, recordiadau sain a cherddoriaeth sy’n perthyn i Gymru neu o ddiddordeb Cymreig.

 

Dywed Anwen Pari Jones ar ran Archif Genedlaethol Sgrin a Sain Cymru;

 

‘Mae’n wych fod ffilmiau o’n casgliadau nawr i’w gweld ar y sgrin fawr. Rwy’n gobeithio y gwneith pobl sy’n pasio cymryd hoe i’w gwylio gan roi cip olwg i orffennol Caerdydd a hefyd diddordeb yn ffilmiau’r Archif. Rydym wastad yn edrych ar ffyrdd o rannu’n casgliadau ac mae hwn yn llwyfan gwych.’

 

Dywed y Cyngh. Nigel Howells, Aelod Pwyllgor Gwaith Chwaraeon, Hamdden a Diwylliant Cyngor Caerdydd;

 

‘Mae defnyddio’r sgrin fawr yn ffordd wych i arddangos Caerdydd a dweud hanes y ddinas wrth drigolion ac ymwelwyr. Mae’n deimladwy iawn gweld hen ffilm o’r ddinas yn cael ei dangos ynghanol datblygiadau cyfoes Dewi Sant.’

 

Bydd y ffilmiau i’w gweld o’r wythnos hon.

 

Os hoffech ragor o wybodaeth am y ffilmiau neu am Archif Genedlaethol Sgrin a Sain Cymru, ewch at www.archif.com neu cysylltwch â:

 

Anwen Pari Jones: 01970 632 535

Sion Jobbins: 01970 632 902 post@llgc.org.uk