Cartref Cyntaf y Llyfrgell

Mon, 09 Jul 07 13:34:00

Ar nos Fercher 4 Gorffennaf dadorchuddiwyd plac i gofnodi lleoliad cyntaf y Llyfrgell Genedlaethol ar Faes Lowri yn Aberystwyth.

Wedi i Aberystwyth gael ei dewis yn lleoliad ar gyfer y Llyfrgell Genedlaethol yn 1907 bu’n rhaid aros rhai blynyddoedd nes bod yr adeilad newydd wedi ei hadeiladu ar riw Penglais. Am y cyfnod rhwng 1907 a 1916 bu’r hen Neuadd Ymgynnull, yr Assembly Hall, ar Faes Lowri a adeiladwyd ar ddechrau’r 19eg ganrif yn gartref dros-dro i’r Llyfrgell. Mae’r adeilad Sioraidd hardd hwn yn wynebu’r Hen Goleg, lleoliad Coleg Prifysgol hynaf Cymru.

Cyflwynwyd y plac, sydd o lechen Gymreig, gan Gymdeithas Ddinesig Aberystwyth gyda chefnogaeth Prifysgol Cymru, Aberystwyth.

Cafwyd cyflwyniadau gan Richard Lewis, Cadeirydd Cymdeithas Ddinesig Aberystwyth, Yr Athro Noel Lloyd, Is-Ganghellor a Prifathro Prifysgol Cymru Aberystwyth a Dr R Brinley Jones CBE, Llywydd y Llyfrgell Genedlaethol.

I’r rhai sydd â diddordeb mewn gwybod mwy am hanes adeilad gogoneddus y Llyfrgell, mae arddangosfa 100: Canrif y Llyfrgell ymlaen yn ystafell arddangos Peniarth tan 5 Ionawr 2008. Bydd y Llyfrgell yn ogystal yn cyhoeddi llyfr am yr adeilad cyn diwedd y flwyddyn. Am ragor o wybodaeth am y Llyfrgell a’i chasgliadau mae llyfr arbennig y canmlwyddiant, Yn y Lle Hwn, nawr ar werth yn siop y Llyfrgell: siop.llgc.org.uk 

Gwybodaeth Bellach:

Siôn Jobbins, Swyddfa’r Wasg LlGC: 01970 632 902  sij@llgc.org.uk

Dolenni:

Prifysgol Cymru, Aberystwyth: www.aber.ac.uk

Cymdeithas Ddinesig Aberystwyth: www.aberystwythcivicsociety.org.uk/