Ffotos o’r Stryd – Gŵyl Ffoto Lens 18-19 Tachwedd

Ffotograffiaeth fydd y gair ar y stryd yn Aberystwyth ym mis Tachwedd - neu, o leiaf yng ngŵyl Lens wrth i ffotograffwyr amlycaf Cymru yn ymgynnull yn y Llyfrgell Genedlaethol ar 18 a 19 Tachwedd 2011. Byddant yno i roi cyflwyniadau darluniadol o’u gwaith ffotograffig ar y thema Ffotograffiaeth Stryd.

Dyma fydd y seithfed ŵyl Lens ac eleni bydd yn cyd-weithio gyda gŵyl ffotograffiaeth newydd arall i Aberystwyth - FfotoAber. www.ffotoaber.com <http://www.ffotoaber.com>

‘Mae penwythnos Lens wastad yn ddigwyddiad difyr a phleserus i bawb sy’n ymddiddori mewn ffotograffiaeth. Rydym yn llwydd i ddenu ffotograffwyr proffesiynol ac amatur a rheini sydd â diddordeb mewn hanes cymdeithasol. Mae’n siaradwyr blaenorol wedi cynnwys ffotograffwyr byd-enwog fel Phillip Jones-Griffiths a David Hurn. Eleni byddwn ni’n cydweithio a menter ffotograffiaeth gynhyrfus newydd i’r ardal – FfotoAber,’ meddai William Troughton sy’n gyfrifol am gasgliad ffotograffau’r Llyfrgell ac yn un o drefnwyr Lens.


Siaradwyr Gŵyl Lens eleni fydd:

Bedwyr Williams: Mae Bedwyr Williams yn artist cysyniadol sy'n byw a'n gweithio ger Caernarfon. Yn 2005 fe gynrychiolodd Cymru yn Biennale Fenis. Mae ei weithiau wedi eu harddangos mewn casgliadau megis y Saatchi Collection, Government Art Collection a Chasgliad yr Amgueddfa Genedlaethol yng Nghaerdydd.

 Jon Pountney: Ganwyd Jon yn Pontrefact yn 1978. Astudiodd ffotograffiaeth yn y Mid Warwickshire College ac yna Gerddi Howard, Caerdydd. Mae nawr yn gweithio yn y Brifddinas fel ffotograffydd masnachol a hysbysebu. Arweiniodd ei gariad at ddiwylliant poblogaidd i’w brosiect diweddaraf, Cardiff before Cardiff.

Tom Wood: Ganed Tom Wood yn 1951 yng ngorllewin Iwerddon. Fe astudiodd Celf Gain yn Leicester ac yna symudodd i New Brighton, ger Lerpwl yn 1978 ble daeth yn adnabyddus yn lleol fel ‘Photieman’. Am y 25 mlynedd nesaf bu iddo ffotograffu bywyd yng Nglannau Mersi - popeth o glybiau nos i gefnogwyr pêl-droed. Mae wedi arddangos yn Tate Britain, Tate Liverpool a Biennale Shanghai.

Dr Paul O’Leary: Mae Paul yn uwch-ddarlithydd yn Adran Hanes a Hanes Cymru, Prifysgol Aberystwyth. Ef yw awdur y gyfrol Immigration and Integration: the Irish in Wales, 1798-1922 (2000) a chyd-olygydd A Tolerant Nation? Exploring Ethnic Diversity in Wales (2003). Mae newydd gwblhau llyfr yn dwyn y teitl Claiming the Streets: Processions and Urban Culture in South Wales, c.1830-1880.

Scott Waby: Bu Scott yn ffotograffydd masnachol cyn symud o Wlad yr Haf i weithio ar egin rhaglen ddigido'r Llyfrgell Genedlaethol yn 1999. Mae nawr yn Bennaeth ar yr Uned Ddigido ac wedi gweithio ar amrywiaeth o brosiectau blaengar gan gynnwys digido rhai o gasgliadau ffotograffig pwysicaf y Llyfrgell.


Ffotograffau yn LlGC
Mae casgliad ffotograffau’r <http://www.llgc.org.uk/index.php?id=84&L=1>  Llyfrgell Genedlaethol yn anferth. Mae’n cynnwys rhyw 800,000 darlun gan gynnwys y ffotograff hynaf a dynnwyd yng Nghymru erioed, daguerroteip o Gastell Margam ger Port Talbot. Tynnwyd y llun gan y Parch. Calvert Richard Jones yn 1841.

Lens – Ffotograffiaeth Stryd
18 a 19 Tachwedd 2011
Llyfrgell Genedlaethol Cymru
Aberystwyth SY23 3BU

Tocynnau: 
Nos Wener yn unig £5. 
Dydd Sadwrn a Nos Wener £22 yn cynnwys cinio.
(£16 NUS/UMCA) Tocynnau ar lein: www.llgc.org.uk/lens

Gwybodaeth bellach:
Siôn Jobbins, Swyddfa’r Wasg LlGC:  01970 632 902  post@llgc.org.uk