Datganoli Darlledu i Gymru? – Darlith Flynyddol yr Archif Wleidyddol

Sut mae’r berthynas rhwng darlledwyr yng Nghymru a Llundain wedi newid ers Datganoli? A yw hi’n amser i Lywodraeth Cymru gymryd rhagor o gyfrifoldeb dros ddarlledu? Dyma rai o’r cwestiynau bydd Menna Richards, OBE, cyn Gyfarwyddwr BBC Cymru, yn eu codi yn narlith flynyddol yr Archif Wleidyddol Gymreig ar nos Wener 4 Tachwedd 2011 yn Llyfrgell Genedlaethol Cymru, Aberystwyth.

Cyfyd y cwestiwn, a yw’r berthynas rhwng Cymru a Llundain, Caerdydd a San Steffan yn broses o ddatblygu parhaus, neu a ddylem dderbyn geiriau’r Arglwydd Reith, fod Cymru wedi ei ‘setlo’ ddydd Iau diwethaf?

‘O ystyried y berthynas rhwng darlledwyr yng Nghymru a Llundain, hoffwn i ofyn ai nawr yw'r adeg i Lywodraeth Cymru chwarae rhan fwy blaenllaw ym mater atebolrwydd y darlledwyr yng Nghymru?’ meddai Menna Richards.

Bu Menna Richards yn Gyfarwyddwr y BBC yng Nghymru am un mlynedd ar ddeg tan fis Mawrth eleni. Rhwng 2009 a 2011 roedd hi hefyd yn gyfarwyddwr ar y BBC ar draws y Deyrnas Unedig, ac o ganlyniad yn aelod o brif fwrdd gweithredol y Gorfforaeth.

Mae ganddi brofiad helaeth o'r byd darlledu. Bu'n flaenllaw yn arwain rhai 
o'r newidiadau mawr yn y BBC ers datganoli ac mae wedi gweld sut mae 
sefydliad mawr Prydeinig yn ymateb i newidiadau gwleidyddol yng Nghymru, yr Alban a Gogledd Iwerddon.

Mae Dr J. Graham Jones, Pennaeth Archif Wleidyddol Gymreig Llyfrgell Genedlaethol Cymru, yn falch iawn i groesawu Menna Richards fel y darlithydd gwadd eleni.

‘Mae’r Archif Wleidyddol Gymreig wedi denu rhai o wleidyddion a haneswyr gwleidyddol pwysicaf Cymru i draddodi’r Ddarlith Flynyddol. Rydym yn falch iawn i groesawu Menna Richards OBE. Bu’n Gyfarwyddwr BBC Cymru ar adeg o newid mawr ym maes datganoli a thechnoleg,’ meddai’r Dr. J. Graham Jones.

Sefydlwyd yr Archif Wleidyddol Gymreig yn 1983. Mae’n casglu llenyddiaeth gan holl bleidiau gwleidyddol Cymru a grwpiau ymgyrchu yn ogystal â gohebiaeth gan rai o’r ffigyrau gwleidyddol mwyaf, o David Lloyd George i wleidyddion heddiw. www.llgc.org.uk/lc/awg_c_awg.htm


Darlith Flynyddol yr Archif Wleidyddol Gymreig
‘“I settled Wales last Thursday” – a view from the Frontier of Broadcasting’   
Menna Richards OBE

5.30pm
Gwener, 4 Tachwedd 2011

DRWM
Llyfrgell Genedlaethol Cymru
Aberystwyth

GWYBODAETH BELLACH:  
Siôn Jobbins, Swyddfa’r Wasg: 01970 632902  sij@llgc.org.uk