Papurau Newydd Cymru Ar-lein

1,000,000 o dudalennau o hanes Cymru hyd 1910 ar-lein, am ddim.

Bydd prosiect Papurau Newydd Cymru Ar-lein Llyfrgell Genedlaethol Cymru'n cael ei lansio gan Huw Lewis, Y Gweinidog Tai, Adfywio a Threftadaeth, yn adeilad y Pierhead ym Mae Caerdydd ar ddydd Mercher 13 Mawrth.

Mae Papurau Newydd Cymru Ar-lein yn adnodd a fydd yn galluogi unrhyw un sy’n ymddiddori yn hanes a phobl Cymru i bori a chwilio 100 a mwy o deitlau o’i chasgliad cyfoethog o bapurau newydd cyn 1910 – a hynny yn rhad ac am ddim. Y cynllun hwn yw’r prosiect digido mwyaf i’r Llyfrgell i ymgymryd ag ef.

Mae prosiect Papurau Newydd Cymru Ar-lein yn cyfrannu at weledigaeth bellgyrhaeddol y Llyfrgell i fod y genedl gyntaf i ddigido'r cyfan o’i chynnyrch print cyhoeddedig a’i rannu yn rhad ac am ddim ar y we.

Meddai’r Llyfrgellydd Andrew Green:
‘Bydd defnydd uchelgeisiol Llyfrgell Genedlaethol Cymru o dechnoleg yn ymestyn yn helaeth ddefnydd a gwerth y cofnod ysblennydd hwn o wybodaeth, Bydd trosi’r fformat papur gwreiddiol i ffurf ddigidol a sicrhau ei fod ar gael am ddim i’w ddefnyddio ar ei gwefan yn trawsnewid y ffordd mae pobl yn dysgu am ac ymchwilio hanes, diwylliant a hunaniaeth Cymru’.

Nid yn unig y bydd Papurau Newydd Cymru Ar-lein yn galluogi’r ymchwilydd i bori a darllen copïau digidol y dudalen wreiddiol ond hefyd i allu chwilio am eiriau, enwau a dyddiadau ar draws yr un filiwn tudalen i gyd ar yr un pryd.    

Mae’r teitlau canlynol eisoes ar gael ar y wefan:  Merthyr Times and Dowlais Times and Aberdare Echo, South Wales Star, Y Gwladgarwr, Y Dydd ar Prestatyn Weekly.

Bydd yr adnodd yn parhau i dyfu wrth i ragor o deitlau gael eu hychwanegu yn ystod 2013, gan gynnwys: Western Mail, North Wales Chronicle, Y Cymro, ar Cardiff Times.

Meddai Huw Lewis, Y Gweinidog Tai, Adfywio a Threftadaeth:

‘Rwy’n falch dros ben fod Llywodraeth Cymru wedi gallu darparu £2 filiwn i gefnogi’r prosiect pwysig yma. Hwn fydd y casgliad mwyaf o destun yn ymwneud â Chymru y gellir chwilio drwyddo, ac fe fydd yn cyfrannu’n sylweddol at weledigaeth y Llyfrgell Genedlaethol o ddigido cof printiedig Cymru yn ei gyfanrwydd.’

Ychwanegodd Carwyn Jones, y Prif Weinidog:

‘Creu dolen gyswllt rhwng ein gorffennol a’n dyfodol yw diben y prosiect uchelgeisiol yma, a diogelu’r ffordd yr adroddwyd hanes ein cenedl yn y wasg ar gyfer cenedlaethau’r dyfodol. Bydd pobl o bedwar ban byd yn gallu chwilio am eiriau, ymadroddion a dyddiadau a dod o hyd i hanesion di-rif, dim ond drwy bwyso botwm. Fel arall, dim ond mewn archifdai y byddai’r deunyddiau hyn ar gael.’

Ariannwyd y cynllun hwn trwy gymorth y Gronfa Buddsoddi Cyfalaf Strategol a Chronfa Datblygu Rhanbarthol Ewrop trwy Lywodraeth Cymru. 


Gwybodaeth Bellach:
Elin Hâf 01970 632534  post@llgc.org.uk

Dolenni Defnyddiol:
papuraunewyddcymru.llgc.org.uk
@LLGCymru #papur