Cymoedd Anthony Stokes

Fri, 11 Jan 08 12:42:00

Mae arddangosfa Anthony Stokes yn cynnwys 100 o ffotograffau lliw a dynnwyd dros y 5  mlynedd ddiwethaf. Cyfyngir y lluniau i’r cymoedd rhwng yr Ebwy a’r Nedd ac o fewn ffiniau Ffordd Blaenau’r Cymoedd a’r M4.

 

Darlunnir y Cymoedd fel rheol, mewn gwahanol fathau o lwyd digalon, ond mae ffotograffau Anthony Stokes yn dangos ochr arall mwy lliwgar lle mae hanes, tirwedd a threfwedd y Cymoedd yn wahanol haenau o adnewyddu ac addasu dros gyfnod o ddegawdau.

 

Esbonia Anthony Stokes mai 'dim ond syniadau o chwaeth gonfensiynol a rhagfarn all beidio gweld rhyfeddod y Cymoedd.’

 

Cytuna’r llenor, Iain Sinclair, ag ef; ‘edrychwch yn agosach. Gallwch ddarganfod hudoliaeth ddi-hid o ffws gwewyr meddwl a statws metropolitan ac yn ei le agwedd fwy hamddenol; tirwedd ddiamser heb ei orffen, mewn newid, yn gofiannau i gyn diwydiannau - gwario arian newydd ar bethau newydd. Mae llethrau’r bryniau yn cuddio hen glwyfau.’   

 

Magwyd mam Anthony Stokes ym Maglan ac Abercannaid, a’i dad ym Mhen-y-bont. Magwyd ef yng Nghaerloyw (Gloucester), er iddo fod yn ymwelydd cyson â Merthyr Tudful a Phen-y-bont yn ei ddyddiau cynnar.  Ag yntau bellach yn 61 oed, treuliodd mwyafrif ei yrfa yn gweithio yn Llundain fel curadur arddangosfeydd gyda diddordeb arbennig mewn celf gyfoes, gan symud i fyw i Gwmogwr 5 mlynedd yn ôl.

 

Sbardunwyd yr arddangosfa gan Amgueddfa Cwm Cynon yn Aberdâr gyda chefnogaeth Cyngor Celfyddydau Cymru a dyna lle cafodd ei lansio yng Ngwanwyn 2007. Ers hynny, mae hefyd wedi arddangos yn Oriel y Bont, Prifysgol Morgannwg ym Mhontypridd dros yr haf a Neuadd Dewi Sant, Caerdydd yn yr hydref. Cynhelir yr arddangosfa yn y Llyfrgell Genedlaethol rhwng 12 Ionawr a 5 Ebrill 2008.

 

 

Agorir yr arddangosfa'n swyddogol ar Ddiwrnod Agored y Llyfrgell ar ddydd Sadwrn 26 Ionawr.

 

Cyhoeddir llyfr i gyd-fynd â’r arddangosfa, The Valleys, gan wasg Seren. Mae’r llyfr 168 tudalen yn ganllaw i’r arddangosfa ac yn cynnwys dros 100 o luniau a thestun gan Iain Sinclair a fagwyd ym Maesteg ond sydd wedi byw a gweithio yn Llundain fel ysgrifennwr a bardd ers nifer o flynyddoedd.

 

 

Am wybodaeth bellach:

 

Siôn Jobbins, Swyddfa’r Wasg LlGC: 01970 632 902  sij@llgc.org.uk

 

Gellir prynu llyfr The Valleys o Siop y Llyfrgell neu o'n siop arlein