Cefndir/Cyflwyniad

 

Mae Casgliad Traethodau Cymru yn cynnwys oddeutu 50,000 o draethodau a thraethodau hir a gyflwynwyd ar gyfer graddau ôl-radd mewn sefydliadau addysg uwch yng Nghymru.  Mae’r casgliad yn cynnwys traethodau a thraethodau hir sy’n deillio o bob gradd PhD a Meistr, yn ogystal â thraethodau hir cyrsiau Meistr a addysgwyd sydd â diddordeb Cymreig neu sydd wedi derbyn rhagoriaeth.

 

Ar bapur y mae’r rhan fwyaf o bell ffordd o’r casgliad cyfredol, ond mae  adneuo electronig yn dod yn fwy a mwy cyffredin. Mae amryw o sefydliadau addysg uwch wedi datblygu cadwrfeydd sefydliadol i storio a darparu mynediad ar-lein i’w hallbwn ymchwil, yn cynnwys traethodau a thraethodau hir electronig, a gyfeirir atynt yn gyffredinol fel e-draethodau.  Yn 2009 dechreuodd Llyfrgell Genedlaethol Cymru a Rhwydwaith Cadwrfeydd Cymru weithio ar y ‘gwasanaeth cynaeafu e-draethodau.’  Mae’r gwasanaeth hwn yn galluogi’r Llyfrgell i gasglu copïau o destun llawn e-draethodau, trwy gynaeafu, a darparu mynediad parhaus iddynt trwy reolaeth  gadwraeth.  Mae hefyd yn golygu y gellir chwilio ar draws Casgliad Traethodau Cymru i gyd, oherwydd gall defnyddwyr chwilio am gopïau print a chopïau electronig o draethodau ar yr un pryd.  Ar ôl cofrestru fel Darllenydd gallwch ofyn am weld copi print o draethawd yn Ystafelloedd Darllen y Llyfrgell neu fel arall, gallwch ofyn am lawrlwytho traethawd neu draethawd hir electronig. 

 

Os ydych yn ddeiliad hawliau ac yn poeni eich bod wedi dod o hyd i ddeunydd ar ein gwefan nad ydych wedi rhoi caniatâd ar ei gyfer, edrychwch ar ein tudalen Hysbysu a Thynnu’r Deunydd i Lawr.

EThOS

 

Gwasanaeth EThOS y Llyfrgell Brydeinig fydd yn cywain pob traethawd PhD a gasglwyd gan Lyfrgell Genedlaethol Cymru o’r sefydliadau sy’n cymryd rhan.  Ewch i http://ethos.bl.uk/ i ddysgu mwy am EThOS.

Partneriaid a Sefydliadau sy’n Cymryd Rhan yn y Prosiect

 

Datblygwyd y gwasanaeth hwn gan Lyfrgell Genedlaethol Cymru ar y cyd â Rhwydwaith Cadwrfeydd Cymru a’i ariannu gan JISC.  Ymysg y sefydliadau sy’n cymryd rhan mae:

• Athrofa Prifysgol Cymru, Caerdydd
• Prifysgol Abertawe
• Prifysgol Aberystwyth
• Prifysgol Bangor
• Prifysgol Caerdydd
• Prifysgol Cymru, Casnewydd
• Prifysgol Cymru Y Drindod Dewi Sant
• Prifysgol Fetropolitan Abertawe
• Prifysgol Glyndŵr
• Prifysgol Morgannwg