Bwriad y sesiynau un-i-un yw cynorthwyo darllenwyr sydd angen arweiniad ar ble i chwilio ymhellach i'w hanes teulu neu hanes lleol a sut i wneud y gorau o'n casgliadau a'n gwasanaethau. Bydd y sesiwn yn cynnwys cyflwyniad i'r adnoddau sydd ar gael yn Ystafell Ddarllen y De megis defnyddio Findmypast ag Ancestry Library i chwilio cyfrifiadau o 1841 hyd 1911 a nifer o gronfeydd eraill. Dangosir sut mae'r broses o ddefnyddio tocyn ar gyfer edrych ar gofrestri plwyf a phapurau newydd ar ficroffilm o fewn yr ystafell yn gweithio. Bydd hefyd cyfle i ddangos sut i gael y gorau allan o'n casgliad o ewyllysiau cyn 1858 sydd ar gael ar-lein. Gellir cynnig cymorth hefyd ar sut i ddefnyddio ein catalog i archifau a llawysgrifau sef ISYS.

Bwriad y sesiynau un-i-un yw cynorthwyo defnyddwyr sydd angen arweiniad ar sut i ddefnyddio ein Catalogau ar-lein ac e-Adnoddau yn fwy effeithiol. Bydd y sesiynau yn galluogi defnyddwyr i ddefnyddio'r Aquabrowser a'r catalog llawn yn fwy effeithiol. Ceir cyflwyniad hefyd i'n gwahanol adnoddau electronig allanol megis y 'Times Digital Archive', 'Eighteenth Century Collections Online (ECCO), 'Early English Books Online' (EEBO) a JSTOR.

Bwriad y sesiynau un-i-un yw cynnig arweiniad i gasgliadau mapiau, ffotograffau, printiau a darluniau y Llyfrgell. Mae gan y Llyfrgell gasgliad mapiau sydd yn cynnwys mapiau argraffedig cynnar, mapiau stad a degwm a rhediad cyflawn o'r Arolwg Ordnans. Y mae'r casgliad gweledol yn gartref i ddelweddau o bob math a lle gan gynnwys gwaith unigolion megis John Parker, Moses Griffiths ac Ingleby ac ym myd ffotograffau, John Thomas a Geoff Charles. Cynigir hefyd arweiniad i gasgliadau'r Llyfrgell o bapurau ystadau Cymru. Yn y rhain, gellir olrhain hanes lleoedd ac unigolion cyn cyfnod mapiau. Y mae'n bosib bod mapiau perthnasol yma yn ogystal. Gellir gofyn am gymhorthfa sydd yn canolbwyntio ar un o'r agweddau hyn yn unig os dymunir.

Bwriad y sesiynau un-i-un yma yw cynnig cyflwyniad i bobl sydd yn ymweld â Llyfrgell Genedlaethol Cymru am y tro cyntaf, ac yn ansicr o beth sydd ar gael yma. Bydd y sesiynau yn ceisio eich cynorthwyo i wneud y defnydd gorau o'r Llyfrgell, ei chasgliadau a'r cyfleusterau sydd ar gael, gyda'r bwriad o'ch helpu i wneud y gorau o'ch amser yma. Bydd y sesiwn yn cynnwys cyflwyniad i'r adnoddau sydd ar gael yn yr Ystafelloedd Darllen unigol, sut i archebu deunydd, y broses llungopïo, a rheolau cyffredinol y Llyfrgell.

Yn ystod y sesiwn byddwn yn cyflwyno’r archif ac yn trafod y canlynol:

• Ystod y casgliad a’r gwasanaethau rydym yn darparu
• Sut mae chwilio’r catalog arlein a gwneud cais am eitem
• Sut mae gwneud ymholiad – yn bersonol, dros y ffôn, trwy lythyr, e-bost neu Question Point
• Sut mae gwylio a gwrando ar ddeunydd
• Ystyriaethau hawlfraint
• Cyngor ar ymwchil pellach

Gallwn hefyd addasu’r sesiwn yn ôl anghenion unigol.