Cefndir y Prosiect:

Mae cadwedigaeth yn un o ddyletswyddau craidd y Llyfrgell.  Mae Isadran Gofal Casgliadau yr Adran Gwasanaethau Casgliadau yn ymdrechu i warchod, cadw, diogelu ac atal unrhyw ddirywiad sy’n effeithio ar gasgliadau’r Llyfrgell. Trwy gwblhau gweithgareddau Gofal Casgliadau sy’n cynnwys camau cadwedigaeth, dulliau cadwraeth ataliol, triniaeth cadwraeth a chynnal casgliadau, mae’n bosibl cyfyngu ar y broses ddirywio ac ymestyn oes ein casgliadau.

Mae llwch a baw ar gasgliadau’n gallu peryglu’r cyfryngau; gall symud i flociau testun neu ar ddogfennau a ddefnyddir. Gall plâu biolegol fwydo ar lwch; gall y llwch hefyd gynnwys sborau llwydni, sy’n gallu egino a thyfu ar y cyfrwng. Mae tystiolaeth o lwch ar yr arwyneb yn arwydd o ddiffyg mewn agwedd bwysig o reoli casgliadau.

Gellir defnyddio dulliau syml, sych i lanhau cyfrolau a dogfennau a phapurau heb eu rhwymo. Gellir glanhau llwch a baw rhydd heb rwbio na defnyddio cyfarpar arbenigol. Bydd gwirfoddolwyr hyfforddedig yn gwneud y gwaith hwn, o dan oruchwyliaeth staff cadwraeth, a bydd yn wasanaeth gwerthfawr i egwyddorion gofal casgliadau.

Lleoliad: Uned Cadwraeth Ataliol


Prif dasgau: Bydd gweithgareddau penodol yn cynnwys:-

• gosod llyfrau yn daclus a diogel ar silffoedd;
• glanhau silffoedd llyfrau symudol/sefydlog;
• glanhau llyfrau.

Gofynion:

Hanfodol
 

• y gallu i weithio mewn tîm;
• y gallu i gyfathrebu’n dda;
• y gallu i weithio gydag ychydig o arolygaeth;
• trefnus a gofalus.

Manteisiol

• y gallu i gyfathrebu yn Gymraeg a Saesneg;
• diddordeb mewn etifeddiaeth ddiwylliannol.

Oriau ac ymrwymiad:  

Mae’r prosiect yn cychwyn ar Awst 30ain.  Bydd sesiynnau yn rhedeg am hanner diwrnod ar ddydd Mawrth a/neu dydd Iau – oriau penodol i’w cadarnhau.

----------------------------------------------------------------------------------------------

----------------------------------------------------------------------------------------------

Cefndir y Prosiect:

Mae’r casgliad hwn, sydd eisoes wedi’i gatalogio, yn cynnwys enwau criwiau dros 600 o longau a ymadawodd â phorthladd Aberystwyth rhwng 1850 a 1910.  Roedd yn orfodol llunio rhestr o’r fath ddwywaith y flwyddyn ar gyfer pob llong a hwyliai ar foroedd gwledydd Prydain.  Ceir hefyd fanylion am y llongau, eu perchnogion a thrigfannau’r morwyr. Y mae’n ffynhonnell achyddol a morwrol gwerthfawr iawn. Fodd bynnag, nid oes modd dod o hyd i enwau'r morwyr o’r catalog.

Prif amcan y prosiect felly fydd creu cronfa ddata y bydd modd ei chwilio, megis enwau morwyr, ei swydd, enwau porthladdoedd, llongau blaenorol, dyddiadau hwylio’r llong a’r dyddiad a’r rheswm dros adael gwasanaeth y llong.

Bydd y prosiect gwirfoddol hwn yn creu arf darganfod adnoddau grymus a gwerthfawr iawn nid yn unig i achyddion ond hefyd i ymchwilwyr eraill, gan gynnwys dysgwyr o’r sector addysg uwch.

Lleoliad:  Adran Gwasanaethau Casgliadau

Prif dasgau:  

• mynegeio enwau morwyr llongau porthladd Aberystwyth;
• mynegeio swyddi’r morwyr;
• mynegeio enwau llongau blaenorol;
• creu data dyddiadau;
• cofnodi manylion eraill yn ôl y galw.

Gofynion:

Hanfodol  

• y gallu i weithio fel rhan o dîm;
• y gallu i weithio gydag ychydig o arolygaeth;
• dycnwch a dyfalbarhad;
• trefnus a gofalus.

Manteisiol

• y gallu i gyfathrebu yn Gymraeg a Saesneg;
• gwybodaeth a diddordeb byw mewn morwriaeth;
• sgiliau cyfrifiadurol.

Oriau ac ymrwymiad: I’w cytuno.  Gobeithir cychwyn y prosiect ym Medi, 2012.

----------------------------------------------------------------------------------------------

Cefndir y Prosiect:  

Mae’r Llyfrgell Genedlaethol yn cynnal ystod eang o arddangosfeydd (sy’n seiliedig yn bennaf ar gasgliadau’r Llyfrgell a gwaith celf gan artistiaid gwadd), gan gynnwys un arddangosfa graddfa fawr thematig flynyddol.  Cynhelir yr arddangosfa hon am gyfnod o 6 mis yn Oriel Gregynnog; un o orielau mwyaf Cymru.  Yn ogystal â hyn, y mae gan y Llyfrgell fannau arddangos eraill o fewn yr adeilad, sy’n llai eu maint, ac a ddefnyddir ar gyfer arddangosfeydd llai.  
Y mae rhai o’n harddangosfeydd yn barhaol ac eraill yn rhai a newidir yn aml, o ran eu cynnwys.  Arddangosir deunydd a gweithiau ar ffurfiau traddodiadol (ar waliau ac mewn casys) a thrwy ddulliau technoleg fodern.  

Lleoliad: Yr orielau a leolir yn Llyfrgell Genedlaethol Cymru, Aberystwyth.

Prif dasgau:  

• Darparu gwybodaeth i’r cyhoedd am y deunydd a arddangosir yn Orielau Cyhoeddus y Llyfrgell;
• Cynorthwyo ymwelwyr - yn unigolion a grwpiau amrywiol - i ddod i adnabod a mwynhau arddangosfeydd;
• Tywys ymwelwyr, gan ateb ymholiadau sylfaenol, er mwyn ychwanegu gwerth at brofiad yr ymwelydd;
• Casglu a throsglwyddo ymateb a sylwadau aelodau o’r cyhoedd am yr arddangosfeydd i staff y Llyfrgell a chynnig syniadau ar sut i wella’r gwasanaeth.

 
Gofynion:

Hanfodol

• Dibynadwyedd;
• Diddordeb mewn arddangosfeydd a gwaith y Llyfrgell;
• Gwybodaeth dda am Gymru, ei hanes a’i phobl;
• Gallu a hyder i ymdrin â phobl o gefndiroedd, a chydag anghenion, amrywiol;
• Gallu i gyfathrebu yn Gymraeg a Saesneg.

Manteisiol

• Gwybodaeth am gasgliadau’r Llyfrgell.

Oriau ac ymrwymiad: I’w cytuno. Cychwyn yn Hydref, 2012.