Mae Deddf Llyfrgelloedd Adnau Cyfreithiol 2003 yn berthnasol i unrhyw un sy’n cyhoeddi yn y Deyrnas Unedig. Yn achos gweithiau a gyhoeddir mewn print, mae’n cynnwys y categorïau canlynol:

• llyfr (yn cynnwys pamffled, cylchgrawn neu bapur newydd),
• dalen o argraffwaith neu gerddoriaeth,
• map, cynllun, siart neu dabl, a
• rhan o unrhyw waith o’r fath.

Rhaid adneuo pob cyhoeddiad newydd a phob argraffiad newydd o gyhoeddiad, a all gynnwys cywiriadau, newidiadau neu gynnwys ychwanegol. Ond nid oes rhaid adneuo ailargraffiadau syml. At hynny, nid oes rhaid i gyhoeddwyr adneuo’r categorïau deunydd canlynol oni wneir cais ysgrifenedig amdanynt gan lyfrgell adnau cyfreithiol:

• Adroddiadau mewnol
• Papurau arholiad
• Amserlenni trafnidiaeth leol
• Dyddiaduron apwyntiadau
• Calendrau wal a desg
• Posteri

Dylid nodi nad y ffaith fod eitem wedi cael Rhif Llyfr Safonol Rhyngwladol (ISBN) neu Rif Cyfnodolyn Safonol Rhyngwladol (ISSN) sy’n golygu bod rhaid ei hadneuo, ond y ffaith ei bod wedi’i chyhoeddi. Dyfernir bod gwaith wedi’i gyhoeddi pan fydd copïau ohono ar gael i’r cyhoedd. Does dim ots ym mhle y cafodd ei gyhoeddi neu ei argraffu, beth yw natur yr argraffnod na faint o gopïau a ddosbarthwyd. Y weithred o gyhoeddi neu ddosbarthu i’r cyhoedd yn y Deyrnas Unedig sy’n peri bod gwaith yn agored i’w adneuo.

I wybod mwy:

• Sut i adneuo cyhoeddiadau print
• Gwybodaeth ychwanegol i gyhoeddwyr

Rwy’n cyhoeddi’r un cynnwys mewn cyfryngau print a digidol; oes angen imi barhau i adneuo print?

Oes, os gwelwch yn dda, tan y byddwch wedi cofrestru’n llwyddiannus i adneuo’n ddigidol a bod y Llyfrgell Brydeinig neu lyfrgell adnau arall wedi sefydlu y gellir prosesu a chadw eich cynnwys digidol. Ein nod yw helpu cymaint o gyhoeddwyr ag sy’n bosibl i drosglwyddo o adneuo print i adneuo digidol, cyn gynted ag y bydd y systemau priodol ac adnoddau digonol yn eu lle.