Collections

Llawysgrifau

: Planisffêr mewn testun Lladin cynnar ar seryddiaeth, llsgr. NLW 735C, f. 10v

Mae yn Llyfrgell Genedlaethol Cymru oddeutu 25,000 o lawysgrifau, sy'n ffurfio'r casgliad mwyaf a phwysicaf o lawysgrifau Cymraeg a Chymreig yn y byd.

yr hynaf yn dyddio o 113 O.C. (llsgr. NLW 4738D)

y diweddaraf yn dyddio o’r flwyddyn 2004 (llsgr. NLW 23933D)

Beth yw llawysgrif?

Cyfrol wedi ei hysgrifennu â llaw, neu gasgliad o ddogfennau wedi eu dwyn ynghyd i ffurfio cyfrol yw llawysgrif fel arfer. Mae llawysgrifau yn cael eu cadw ar wahân i gasgliadau archifau'r Llyfrgell, er bod y berthynas rhyngddynt yn agos.

Ysgrifennwyd llawysgrifau’r Llyfrgell ar bapur, memrwn, papyri, dail, llechi ac amryfal gyfryngau eraill. Mae gennym hefyd enghreifftiau o lawysgrifau mewn amryw o wahanol ieithoedd, gan gynnwys Cymraeg, Saesneg, Lladin, Ffrangeg a Chernyweg.

Mae yn y Llyfrgell 2 brif ddosbarth o lawysgrifau, sef

Casgliadau Llawysgrifau cyffredinol

Casgliadau Llawysgrif Arbennig:

Peniarth

Cwrtmawr

Llanstephan

: Yr unig lythyr a erys yn llaw yr emynyddes, Ann Griffiths, llsgr. NLW 694D, f. 1

Sut mae eu canfod?

Bellach, catalogir holl dderbynion llawysgrif newydd y Llyfrgell yn electronig, ac mae mwy a mwy o’r disgrifiadau blaenorol yn cael eu hychwanegu at y gronfa, a’u hadolygu.

Gellir cael mynediad arlein i’r llawysgrifau hynny sydd wedi eu catalogio drwy chwilio ar gatalogau arlein y Llyfrgell (llawysgrifau a gatalogwyd cyn 1999 , llawysgrifau a gatalogwyd ar ôl 1999. Gellir chwilio am enwau, pynciau ac enwau lleoedd, ynghyd â chwilio testun rhydd. Gellir hefyd bori yn yr ystafell ddarllen mewn disgrifiadau cynnar a gyhoeddwyd mewn nifer o wahanol gatalogau papur.

Ymhle gellir darllen llawysgrifau?

Wedi sicrhau tocyn darllen, darllenir llawysgrifau yn Ystafell Ddarllen y De yn y Llyfrgell. Mae yno gyfarpar arbennig, megis lamp uwch-fioled, i hwyluso’r gwaith o astudio’r deunydd cynharaf, yn ogystal â chyfeirlyfrau hwylus y gellir ymgynghori â hwy wrth ymchwilio.

Cyfyngir mynediad at rai llawysgrifau oherwydd eu hoed a’u cyflwr, a darperir copïau dirprwyol (digidol neu ficroffilm) ohonynt ar gyfer darllenwyr.

Ymholiadau ac Arddangosfeydd

Dylid cyfeirio ymholiadau am gasgliadau llawysgrif y Llyfrgell at y tîm ymholiadau.

Dangosir detholiad o lawysgrifau’r Llyfrgell yn Ystafell Arddangos Hengwrt trwy gydol y flwyddyn.