Sefydlwyd Uned Cadwraeth Ataliol y Llyfrgell Genedlaethol yn ystod y 1990au er mwyn canolbwyntio ar lanhau ac amddiffyn y casgliadau drwy ddulliau cadwraethol.

Mae’r uned hon yn gymorth i arafu dadfeiliad y gwrthrychau gan estyn eu hoes yn sylweddol.

Mae amgylchedd sefydlog parthed tymheredd a lleithder cymharol yr awyr yn hollbwysig er lles y casgliadau. Rydym yn monitro amgylchedd y storfeydd a’r mannau arddangos er mwyn sicrhau nad yw’r amodau’n rhy sych neu’n rhy laith. Gall awyrgylch rhy sych freuo deunyddiau fel papur, lliain a lledr, a gall awyrgylch rhy laith ddenu llwydni a phryfetach gan beryglu’r casgliadau.

Hyfforddir holl staff newydd y Llyfrgell mewn ymwybyddiaeth cadwedigaeth fel rhan o'u cwrs sefydlu.

Blychau a Ffolderi Amddiffynnol

Gan fod blwch yn creu microhinsawdd o’i fewn ac yn amddiffyn llyfrau rhag llu o elynion, rhoddir pwys mawr ar focsio eitemau o gasgliadau’r Llyfrgell.

Ym 1999, prynodd y Llyfrgell beiriant Kasemake 503 ar gyfer gwneud blychau. Mae’r byrddau a ddefnyddir i gynhyrchu’r blychau i gyd yn ddiasid ac o ansawdd cadwraethol. Bellach mae gennym ail beiriant gwneud blychau yn yr uned, a rhwng y ddau beiriant cynhyrchir oddeutu 10,000 o flychau’n flynyddol.