Ym mis Ionawr 1907 yn Llandudno sefydlwyd cangen gyntaf y mudiad er ennill y bleidlais i ferched yng Nghymru. Bu merched yn cynnal cyfarfodydd yng Nghymru ers yr 1870au ac yn 1874 bu Americanes o'r enw Miss Beedy ar daith drwy'r wlad yn ceisio ennyn cefnogaeth i'r achos. Sefydlwyd canghennau yn y Rhyl a Chaerdydd yn 1908, ac yna yn Sir Fôn a Bangor yn 1912.

Un o sylfaenwyr cangen Caerdydd oedd Millicent Mackenzie, yr unig wraig i sefyll fel ymgeisydd seneddol yng Nghymru yn Etholiad Cyffredinol 1918. Tueddai rhai o'r merched a ymladdai am y bleidlais i gefnogi'r Blaid Geidwadol, oherwydd credent y byddai'r Ceidwadwyr yn fwy tebygol o ildio i'w gofynion.

Y digwyddiad enwocaf yng Nghymru yn ymwneud â'r swffragetiaid oedd helynt Llanystumdwy ym mis Medi 1912. Gwahoddwyd Lloyd George yno i agor y neuadd bentref newydd. Cyn gynted iddo ddechrau siarad, tarfwyd arno gan bobl yn gweiddi, "Votes for Women" . Aeth hi'n gythrwfl difrifol - tynnwyd gwallt a rhwygwyd dillad rhai o'r merched gan yr heddlu, a cheisiwyd taflu gwraig dros y bont i mewn i afon Dwyfor.