Ar farwolaeth Tom Hooson, yr Aelod Seneddol Ceidwadol, yn 1985 galwyd isetholiad ym Mrycheiniog a Maesyfed. Roedd Tom Hooson wedi bod yn Aelod Seneddol yno ers i'r Ceidwadwyr ddod i bŵer yn 1979.

Roedd saith ymgeisydd seneddol ar gyfer y sedd hon: Richard Livsey (Y Gynghrair Ryddfrydol / Liberal Alliance), Richard Willey (Llafur), C. J. Butler (Ceidwadwyr), Mrs Janet Davies (Plaid Cymru), David Sutch (Official Monster Raving Loony Party) a dau ymgeisydd annibynnol.

Galwyd yr isetholiad yn ystod cyfnod anodd i'r llywodraeth, ac fe gafodd yr etholiad sylw mawr gan y wasg a'r cyfryngau Prydeinig. Cafodd y Ceidwadwyr gryn syndod pan enillwyd sedd a arferai fod yn sedd ddiogel iddynt gan Richard Livsey (Y Gynghrair Ryddfrydol).

Roedd hwn yn gyfnod pan oedd clymblaid, dan yr enw y Gynghrair, rhwng Plaid y Democratiaid Cymdeithasol (SDP) a'r Blaid Ryddfrydol yn ennill tir. Ffurfiwyd Plaid y Democratiaid Cymdeithasol (SDP) yn 1981, yn bennaf gan aelodau'r Blaid Lafur a oedd yn anfodlon â pholisïau adain chwith Llafur ac a welai gyfle i drydedd plaid wneud argraff ar wleidyddiaeth Prydain. Ymhlith arweinwyr amlycaf yr SDP yng Nghymru oedd Tom Ellis a Gwynoro Jones.

Fel yr SDP, fe fanteisiodd y Rhyddfrydwyr ar anfodlonrwydd yr etholwyr â'r ddwy blaid fawr a thrwy'r Gynghrair y llwyddont i drechu'r Ceidwadwyr a Llafur yn isetholiad Brycheiniog a Maesyfed.