Ymgyrchu! - Pleidleisio - Lleiafrifol

Y Blaid Werdd

Sefydlwyd y Blaid Ecolegol yn 1973, ac yn Etholiad Cyffredinol 1979 roedd ganddi 54 ymgeisydd ym Mhrydain. Nid enillodd yr un o'r ymgeiswyr yma sedd, a chyfanswm eu cefnogaeth oedd 1.2% o'r bleidlais.

Ym Medi 1985, yn dilyn diffyg llwyddiant etholiadol, newidiodd y blaid ei henw i'r Blaid Werdd. Enwebwyd 133 ymgeisydd ganddi i ymladd yn Etholiad Cyffredinol 1987.

"Mae'r cytundeb rhwng PLAID CYMRU a'r GWYRDDION yn rhoi cyfle i ni newid pethau. i gael gweithredu dros bethau sy'n cyfrif - dros Gymru a thros y BLANED. Mae'n gyfle rhy dda i'w golli."

Taflen Y Blaid Werdd 'Let's Make History on our own doorstep'

Yn Chwefror 1992 cafwyd cytundeb o fewn y Blaid Werdd (a elwid yn 'Gytundeb Rhaeadr') a oedd yn cadarnhau hawl y Blaid Werdd yn lleol i gefnogi neu dderbyn cefnogaeth oddi wrth bleidiau eraill.

Daeth awr fawr y Blaid Werdd yn ystod Etholiadau Ewropeaidd 1989 pan gawsant 2.3 miliwn o bleidleisiau, er na chawsant afael ar sedd. Enillodd y Blaid Werdd 15,832 o bleidleisiau yn etholiad Ewropeaidd Gogledd Cymru lle cipiodd Joe Wilson (Llafur) y sedd oddi wrth Beata Brookes (Ceidwadwyr). Dim ond pedwar cant o aelodau a oedd gan y Blaid Werdd yng Nghymru ar y pryd, ond daeth yn drydydd mewn tair allan o bedair etholaeth gan wneud yn well na'r Rhyddfrydwyr.

Bu cydweithrediad rhwng arweinwyr Plaid Cymru ac arweinwyr y Blaid Werdd yng Ngheredigion er 1981. Yng nghynhadledd Plaid Cymru yn 1989 penderfynwyd cynnal cyfarfodydd achlysurol gyda'r Blaid Werdd er mwyn trafod polisi economaidd ecolegol i Gymru. O ganlyniad i'r cyfarfodydd hyn drafftiwyd Polisi Economaidd Gwyrdd.

Etholwyd Cynog Dafis yn AS dros Blaid Cymru a Phlaid Werdd Ceredigion yn Etholiad Cyffredinol 1992. Erbyn Etholiad Cyffredinol 1997 roedd y cytundeb swyddogol rhwng Plaid Cymru a'r Blaid Werdd yng Ngheredigion wedi dod i ben. Safai Cynog Dafis bellach fel ymgeisydd dros Blaid Cymru yn unig, er bod y Blaid Werdd yng Ngheredigion yn parhau i ddangos cefnogaeth answyddogol iddo.

"Mae gwleidyddiaeth 'werdd' yn seiliedig ar ffeithiau syml na allwn bellach mo'u hanwybyddu. Dim ond un blaned fregus sydd gennym i'w rhannu, i ofalu amdani ac i'w throsglwyddo i genedlaethau'r dyfodol. Y mae angen amgylchedd glân, ffordd iach o fyw a byd heddychlon arnom ni i gyd er mwyn goroesi.
Yn lle hyn, rydym yn gweld ein planed yn cael ei rhwygo gan drachwant, yn cael ei dinoethi o'i hadnoddau naturiol, ei gorlethu gan lygredd ac o dan fygythiad rhyfel a thrychinebau ecolegol. Rydym yn wynebu dyfodol llwm os na newidiwn bethau'n awr.

Cyfieithiad o daflen Y Blaid Werdd, 'What's the Big Idea?'


Y Blaid Gomiwnyddol
Mudiad Gweriniaethol Cymru
Y Blaid Werdd

Top y dudalen		Tudalen Flaen Ymgyrchu!